Мэкъумэш хъыбархэр

    «PROяблоко-2026»

Урысей Федерацэм пхъэщхьэмыщхьэрэ мэракIуэ лIэужьыгъуэу къыщагъэкIым и куэдагъымкIэ Кавказ Ищхъэрэм и щIыналъэхэр къэралым щыпэрытщ икIи ерыскъымкIэ шынагъуэншагъэр къызэгъэпэщынымкIэ абыхэм я хэлъхьэныгъэр къэлъытэгъуейщ, жиIащ УФ-м мэкъумэш хозяйствэмкIэ и министрым и къуэдзэ Разин Андрей, Минводы щекIуэкIа «PROяблоко-2026» дунейпсо гъэлъэгъуэныгъэм щыIэу.

 КъулыкъущIэм къызэрыхигъэщамкIэ, къэралым пхъэщхьэмыщхьэрэ мэракIуэ лIэужьыгъуэу къыщрахьэлIэжым и процент 73-м щIигъур Къэбэрдей-Балъкъэрым, Ставрополь, Краснодар щIыналъэхэм, Кърымым зэхэту къалъос. Апхуэдэу щыхъукIи, УФ-м мыIэрысэу къыщыпачыжым и куэдагъым хуэдищкIэ хагъэхъуащ иужьрей илъэси 10-м къриубыдэу е тонн мелуани 2-м нызэрыхьэсащ. Мыбдежым, шэч къытумыхьэжыну, Къэбэрдей-Балъкъэрыр щыпэрытщ. 

КИФЩI-м щыяпэщ

 Кавказ Ищхъэрэм и щIыналъэхэм шыгъулдыкъащхъуэу (голубикэ) къыщрахьэлIэжым и куэдагъымкIэ Къэбэрдей-Балъкъэрыр япэ итщ. А мэракIуэ лIэужьыгъуэм щыщу псори зэхэту КИФЩI-м илъэс къэс щызэщIакъуэж хабзэ тонн 440-450-м щыщу тонн 300-р ди республикэм къыщагъэкI е псоми зэхэту яхузэфIэкIым и процент 70-м нэблагъэ мэхъу ар.

Абы нэмыщI, Кавказ Ищхъэрэм и щIыналъэхэм ящыщу КъБР-м япэу щыщIадзащ шыгъулдыкъащхъуэр мэкъумэш, фермер, уней IуэхущIапIэхэм къыщагъэкIын. ИкIи, иужьрей илъэсхэм ди деж апхуэдэу къыщрахьэлIэжым и куэдагъым ди гъунэгъу щIыналъэхэри тригъэгушхуащ я дежи ар щащIэну.

 КъищынэмыщIауэ, шыгъулдыкъащхъуэр республикэм и унагъуэхэми жыджэру къыщагъэкI хъуащ икIи, щIэупщIэм зэрыхэхъуэ зэпытыр къэплъытэмэ, нэхъыбэжым абы зэрызратынум шэч хэлъкъым.

Лым хагъахъуэ

Къэбэрдей-Балъкъэрым Мэкъумэш хозяйствэмкIэ и министерствэм къызэритамкIэ, 2026 гъэм и щIышылэм – мэлыжьыхьым къриубыдэу республикэм и фермер, уней IуэхущIапIэхэм лырэ джэдкъазылу къалэжьам и куэдагъым проценти 4,3-кIэ хагъэхъуащ.

Министерствэм къыщыхагъэщащ ди щIыналъэм и хьэрычэт IэнатIэ мыинымрэ курытымрэ хэт и мэкъумэш IуэхущIапIэхэр щIыналъэм ерыскъымкIэ и шынагъуэншагъэр къызэгъэпэщыным жыджэру зэрегугъур. ЖыпIэнурамэ, Къэбэрдей-Балъкъэрым лы продукцэу къыщыщIагъэкIым и процент 26-м щIигъур фермер, уней IуэхущIапIэхэм къалъос.

 Къэбгъэлъагъуэмэ, къапщытэж пIалъэм къриубыдэу Къэбэрдей-Балъкъэрым лырэ джэдкъазылу къыщалэжьащ (псэууэ шэчауэ) тонн мин 35,7-рэ.

  ХЬЭЩЫКЪУЕЙ Олег.