Псы къабзэ щымыщIэн хуэдэу

Инфраструктурэ

«Коммунальнэ инфраструктурэр егъэфIэкIуэн» къэрал пэхуэщIэм ипкъ иткIэ 2026 гъэм Къэбэрдей-Балъкъэрым щаухуэнущ, къыщагъэщIэрэщIэжынущ е къызыхуэтыншэу щызэрагъэпэщыжынущ псы къыщыщIаш, щызэбгратыкI щIыпIэу 12.

Лэжьыгъэхэм къызэщIрагъэубыдэнущ Налшык, Бахъсэн, Прохладнэ къалэхэм, Хьэбэз, Шэджэм ЕтIуанэ, Прималкинскэ, Инарыкъуей, Акъбащ Ипщэ, Мэрзэхъу, Бедык къуажэхэм щыIэхэр. Абы нэмыщI, муниципалитету 7-м – Налшык, Прохладнэ къалэхэм, Куба, Прималкинскэ, Каменномост, Шэджэм ЕтIуанэ къуажэхэм я псы къыщIэшыпIэхэмрэ псы зэрызэбгратыкI бжьамийхэмрэ зыхуей хуэгъэзэным ехьэлIауэ зэхаублэну Iуэхугъуэхэм 2027 гъэми пащэнущ. Абыхэм псоми зэхэту километр 35-рэ я кIыхьагъ хъунущ.

КъищынэмыщIауэ, лэжьыгъэ нэхъ инхэр щрагъэкIуэкIынур Налшык и «Нэхъыщхьэ» псы къыщIэшыпIэмрэ псы зыгъэкъабзэ станцымрэщ. Ахэр зыхуей хуагъэза нэужь, къалэдэсу мин 17,5-м щIигъум фIагъ лъагэ зиIэ псы къабзэ зэпымыууэ яIэрыхьэнущ.

 ЖыпIэнурамэ, «Коммунальнэ инфраструктурэр егъэфIэкIуэн» пэхуэщIэм ипкъ иткIэ 2028 гъэ пщIондэ Къэбэрдей-Балъкъэрым щрагъэкIуэкIыну зэIузэпэщыныгъэ лэжьыгъэхэм сом меларди 4-м нэблагъэ хухахынущ.

Мыдрейуэ, 2025 гъэм къриубыдэу КъБР-м и къалэрэ къуажэу 15-м псы къабзэ зэрыкIуэ, зэрызэбгратыкI я бжьамийуэ километр 84-м нэблагъэ зэIузэпэщ ящIащ.

      ЩЭУЕЙ Былэ.