Республикэм и медицинэ IэнатIэм зегъэужьынымкIэ щIыналъэм лэжьыгъэшхуэ щрагъэкIуэкI. Апхуэдэу жыджэру лажьэ къэрал программэхэмрэ лъэпкъ проектхэмрэ хыхьэу республикэм и медицинэ IуэхущIапIэ куэд сыт и лъэныкъуэкIи зыхуей хуагъэзэжащ.
Бахъсэн район сымаджэм и поликлиникэ къудамэу Зеикъуэ дэтым метр зэбгъузэнатIэу 2872-рэ хъу ухуэныгъэ къыпащIыхьынущ. IуэхущIапIэр сыт и лъэныкъуэкIи зэпэщ ящIмэ, абы зы махуэ лэжьэгъуэм цIыху 350-м зыхуэныкъуэ дэIэпыкъуныгъэхэр щагъуэтыфынущ. Поликлиникэм къепхауэ щытынущ жылэдэс мин 31-м щIигъу, абы щыщу мини 7-р сабийщ. КъудамэщIэм хэтынущ IэщIагъэлI зэхуэмыдэхэр щылэжьэну, сымаджэм и узыншагъэр къыщапщытэну пэшхэр. IуэхущIапIэр иджырей медицинэ IэмэпсымэхэмкIэ, хьэпшыпхэмкIэ, унэлъащIэхэмкIэ къызэрагъэпэщынущ.
Унэм и хъуреягъкIэ щыIэ щIыналъэр зэIузэпэщ ящIынущ: санитар транспортым папщIэ асфальт тралъхьэнущ, лъэс лъагъуэхэр зэрагъэпэщынущ, щхъуантIагъэкIэ ягъэдэхэнущ. Иджыпсту проект-къэхутэныгъэ лэжьыгъэхэр ирагъэкIуэкI. Поликлиникэр къэгъэщIэрэщIэжыным хуэунэтIа лэжьыгъэхэр 2027 гъэм яухыну я мурадщ.
Прохладнэ къалэм дэт сабий поликлиникэр 1973 гъэм яухуауэ щытащ. Абы лъандэрэ илъэс 36-рэ дэкIыжащи, сыт и лъэныкъуэкIи зыхуей хуэзэу зэгъэпэщыжыным иджы япэу и ужь ихьауэ аращ. Метр зэбгъузэнатIэу минитI хъу, къатищу зэтет поликлиникэр медицинэ IуэхущIапIэхэм я жыпхъэщIэхэм хуэкIуэу щытынущ.
Зэгъэпэщыжыныгъэ лэжьыгъэхэм хыхьэу унащхьэр, инженер коммуникацэхэр зэрахъуэкIынущ, бжэхэмрэ щхьэгъубжэхэмрэ яхъуэжынущ, унэ щIыбыр къагъэщIэрэщIэжынущ. Мы зэманым пэшхэм я щытыкIэр яхъуэж, унащхьэр зыхуей хуэгъэзэным и ужь ихьащ. КъызэрагъэлъэгъуамкIэ, кърахьэжьа Iуэхур 2028 гъэм и кIэм нагъэсынущ.
Апхуэдэу Аруан район сымаджэщым и сабий поликлиникэ къудамэм зэгъэпэщыжыныгъэ лэжьыгъэр щрагъэкIуэкIа нэужь, хэпщIыкIыу ефIэкIуащ педиатрие IэнатIэр. Япэм ар сымаджэщым пэш щхьэхуэу хэту щытамэ, иджырей мардэхэм тету яухуа унэм ягъэIэпхъуащ. Махуэ лэжьэгъуэм цIыхуи 150 зыхуэныкъуэ дэIэпыкъуныгъэхэр щагъуэтыфынущ.
Къулъкъужын Ипщэ къуажэм дэт амбулаторием и унащхьэр, инженер коммуникацэхэр зэрахъуэкIащ, унэ щIыбыр къагъэщIэрэщIэжащ. IуэхущIапIэм цIыху мини 3000-м щIигъу егъэщIылIащ, абыхэм ящыщу 663-р сабийщ. Амбулаторием щылажьэхэми абы екIуалIэхэми я тыншыпIэм хуэщIауэ псори къызэрагъэпэщащ.
Зэгъэпэщыжыныгъэр щрагъэкIуэкIынущ Сэрмакъ, Черная Речкэ къуажэхэм дэт амбулаториехэм. Шэджэм щагъэтIылъ сабий поликлиникэм и лъабжьэр.
Бахъсэн район сымаджэщым хирургие къудамэщIэ щаухуэ, Баксаненкэ къуажэм и амбулаториер, Май къалэм дэт поликлиникэр, Нарткъалэ дэт, ЩIыналъэхэм зэдай, узыфэ зэмылIэужьыгъуэхэр зыпкърытхэм щеIэзэ сымаджэщым и хирургиу къудамэр, Тэрч район сымаджэщым и унэр зэрагъэпэщыж.
