ЕхъулIэныгъэхэр яIэщ

ЦIыхухэр зыхуэныкъуэ  медицинэ Iуэхутхьэбзэхэр фIагъ иIэу икIи и чэзум яIэрыхьэнымкIэ зыужьыныгъэм хуэунэтIа лэжьыгъэшхуэм яужь щитщ  щIыналъэм. Абы ипкъ иткIэ республикэм щаухуэ медицинэ IуэхущIапIэщIэхэр, куэдым зэгъэпэщыжыныгъэхэр щрагъэкIуэкI. КъищынэмыщIауэ, IэщIагъэлIхэм я Iэзагъэм зэрыхагъэхъуэным сытым щыгъуи хущIокъу, ахэр жыджэру хэтщ къэралым къыщызэрагъэпэщ медицинэ зэхыхьэхэм. Апхуэдэу къыхэгъэщыпхъэщ республикэм узыншагъэр хъумэнымкIэ и IэнатIэр унэтIыныгъэ куэдкIэ къэралым щапхъэ зытраххэм ящыщ зэрыхъуар.

IуэхущIапIэхэр къызыхуэтыншэу зэрызрагъэпэщыжым и гугъу пщIымэ, иджыблагъэ Бахъсэн районым хыхьэ Къулъкъужын Ипщэ къуажэм и амбулаториер «ГъащIэ кIыхь икIи жыджэр» лъэпкъ проектым хыхьэ «ЦIыхухэм япэ дэIэпыкъуныгъэхэр щрат медицинэ IэнатIэхэр къэгъэщIэрэщIэжын» щIыналъэ программэмкIэ сыт и лъэныкъуэкIи зыхуей хуагъэзащ.  IуэхущIапIэм и унащхьэр зэрахъуэкIащ, унэ щIыбыр къагъэщIэрэщIэжащ, инженер коммуникацэхэр, бжэ-щхьэгъубжэхэр щIэкIэ яхъуэжащ, и кIуэцIыр зэрахьащ. КъищынэмыщIауэ, медицинэ дэIэпыкъуныгъэхэр къызэгъэпэщынымкIэ иджырей мардэхэм тету унэм и кIуэцIыр щIэрыщIэу яубзыхужащ.

Иджыпсту амбулаторэр жыпхъэщIэм тету мэлажьэ. IэщIагъэлIхэм сымаджэхэр диагностикэ щащI, абыхэм щеIэзэ пэшхэр унэлъащIэхэмрэ IэмэпсымэхэмкIэ ирикъуу къызэгъэпэщащ. Ӏуэхущӏапӏэм медицинэ дэӏэпыкъуныгъэ щагъуэт цӏыху 3000-м щӏигъум, абыхэм ящыщу 663-р сабийщ.

КъБР-м узыншагъэр хъумэнымкIэ и министр Къалэбатэ Рустам  жиIащ къуажэхэм япэ медико-санитар дэIэпыкъуныгъэхэр щегъэфIэкIуэнымкIэ IэнатIэхэм щрагъэкIуэкI зэхъуэкIыныгъэхэм мыхьэнэшхуэ зэраIэр икIи къыхигъэщащ 2028 гъэм и кӏэ пщӏондэ лъэпкъ проектым ипкъ иткӏэ узыншагъэр хъумэнымкӏэ объекту 3 зэрыщаухуэнур, 2 зэрыщызэрагъэпэщыжынур.

Прохладнэ къалэм дэт сабий поликлиникэми щрагъэкIуэкI зэгъэпэщыжыныгъэхэр. Мы зэманым поликлиникэм и унащхьэр зэрахъуэкI. АдэкIэ щхьэгъубжэхэр, инженер коммуникацэхэр хъуэжыныр, унэм и щIыбри, и кIуэцIри зыхуей хуэгъэзэжыныр къапэщылъщ.

Амбулаторием и инагъыр метр зэбгъузэнатIэу минитIым ноблагъэ. Ар мыхьэнэшхуэ зиIэ социальнэ IэнатIэщ, сыт щхьэкIэ жыпIэмэ, илъэс къэс мыбы сабий мин 23-м нэблагъэм медицинэ дэӏэпыкъуныгъэр щагъуэт.

Поликлиникэм зэгъэпэщыжыныгъэхэр щекIуэкIыхукIэ, абы егъэщIылIахэм зыхуэныкъуэ Iуэхутхьэбзэхэр щыхуащIэнущ Прохладнэ район сымаджэщым. Лэжьыгъэр 2028 гъэм и кIэм ирихьэлIэу нагъэсыну я мурадщ.

***

КъБР-м узыншагъэр хъумэнымкIэ и министр Къалэбатэ Рустам хэтащ Тэтэрстаным щекIуэкIа, «Медицинэм и шынагъуэншагъэр: технологиехэмрэ унафэхэмрэ» IV щIэныгъэ-практикэ конференцым.

Къалэбатэм и къэпсэлъэныгъэр теухуауэ щытащ щIыналъэм шынагъуэншэ икIи фIагъ зиIэ медицинэ дэIэпыкъуныгъэ къыщызэгъэпэщыным и Iуэхум зэкIэлъыкIуэу зэрыбгъэдыхьэм. Зэхыхьэм хэтхэм яфIэгъэщIэгъуэн хъуащ абы къигъэлъэгъуа лэжьэкIэр  икIи поликлиникэхэм щыщIэдзауэ сымаджэщ инхэм нэс цIыхухэм хуащIэ медицинэ Iуэхутхьэбзэхэр зэрырагъэфIакIуэ щIыкIэр щапхъэу къалъытащ.

Министрым и докладым къыщыхигъэщащ лэжьыгъэм зэхъуэкIыныгъэ зэрыхалъхьар:  «унафэ - кӏэлъыплъыныгъэ» жыпхъэм къытекӏри, «ӏуэхум къыщыщӏэдзауэ унафэм нэс» бгъэдыхьэкӏэм хуэкӏуащ. Иджы япэщIыкIэ ӏуэхум  и щытыкIэр къэзыхутэ, зэпкърызых, гугъуехь зыпылъ щӏыпӏэхэр къэзыгъэнаIуэ, абы ипкъ иткIэ къалэнхэр зыубзыху лэжьакӏуэ гуп къызэрагъэпэщ. Абы ӏэмал къует лэжьыгъэр тэмэму зэфIэха хъунымкIэ хэкIыпIэ нэхъыбэ къэбгъэсэбэпыну.

ЗэхъуэкIыныгъэм и ӏыхьэ нэхъыщхьэр медицинэ ӏуэхущӏапӏэхэм я унафэщӏхэр Iуэхум  зэрыхашэрщ. Дохутыр нэхъыщхьэхэр проектхэм я унафэщӏ хъуащ, абы IэнатIэхэр нэхъ зэпищIащ, жэуаплыныгъэми хигъэхъуащ.

Министрым и докладым и гупсысэ нэхъыщхьэу щытращи, фӏагъыр - ар зэ акцэкъым, атӏэ технологиехэм, мардэхэм, сымаджэхэм я лъэӏухэм ятещIыхьауэ зэпымыууэ лэжьэнырщ. Къалэбатэм жиIащ IэнатIэм ехъулIэныгъэ ущиIэн папщIэ, медицинэм и технологиехэм, жыпхъэщIэхэм задэбужьу, сымаджэхэм я гукъеуэр, лъэIур зэхэпхыу зэпыу зимыIэ лэжьыгъэ егъэкIуэкIын зэрыхуейр. «Щӏыналъэм узыншагъэр хъумэнымкӏэ и IэнатIэ псори зэхуэдэу фӏагъым хущIэкъун хуейщ, ахъумэ ар ӏуэхущӏапӏэ щхьэхуэм и къалэн закъуэкъым. А къыхуеджэныгъэм утетмэ, лэжьыгъэм сытым дежи ехъулIэныгъэ ущиIэнущ», - къыхигъэщащ министрым.

ЩхьэщэмыщI Изэ.