Сыт апхуэдиз уэшх къыщIешхыр?

Дызэрыт илъэсым и гъэмахуэр ипэ итахэм зыгуэркIэ къащхьэщокI. Псом хуэмыдэу, бадзэуэгъуэр. ИгъащIэ лъандэм хуабэр нэхъ щыетауэ къекIуэкIа мазэр уэлбанэрилэу къыщIэкIащ.

Гъэмахуэр уэшхрилэмэ, ар гъавэм дежкIэ зэрынэхъыфIым шэч хэлъкъым, дауи, уэлбанэр псыдзэм е ятIэпсым хуэмыкIуэмэ. ЦIыхухэр арэзы дыпщIыну зэрыгугъури Iуэхум хэбгъэкIыпэ хъунукъым. Иджы псалъэмакъ гуэрхэр къежьащ пшэхэм уэшхыр щIахуэмыубыдыж щхьэусыгъуэм теухуауэ. «Интернет къэпщытакIуэхэм» зэрыжаIэмкIэ, Кавказ Ищхъэрэм мыухыж уэлбанэр къэзышар гъэмахуэпэм Ставрополь крайм къыщагъэщхьэпэ къэухь IэрыщIым и Iэмалхэрщ. Уеблэмэ псалъэмакъхэр апхуэдизкIэ гуащIэ хъуати, Ставрополь крайм мэкъумэш хозяйствэмкIэ и министр Ишков Константин утыкум къиувэн хуей хъуащ, щIыналъэр уэлбанэрилэ зэрыхъуар зытралъхьэ «Росгидромет»-м и кхъухьлъатэр зэрыкIуэжрэ куэд зэрыщIар цIыхухэм яжриIэу. А псом щыгъуазэ дещI «Ставропольмедиа» хъыбарегъэщIапIэм.

КъызэрыщIэкIымкIэ, гъатхэпэм и 25-м щегъэжьауэ мэлыжьыхьым и 25-м пщIондэ, Ставрополь крайм щагъэтIыса гъавэр уэгъум ирамыгъэхьын мурадкIэ, унафэщIхэм «Росгидромет» IуэхущIапIэм зыхуагъазэри, «уэшх къезыджэ» кхъухьлъатэр щIыналъэм къашауэ щытащ. Ар мы гъэм мазэ псокIэ крайм зэрыщылэжьэнумкIэ хъыбар зэбгритыкIауэ щытащ губернатор Владимиров Владимир. Лэжьыгъэхэр екIуэкIыху, уэшхыу къешх хабзэм нэхърэ процент 30-кIэ нэхъыбэ къешхащ. УэшхкIэ узыщыгугъ хъуну пшэхэм елэжьынырт техникэ гъэщIэгъуэным и зэфIэкIри, а лъэхъэнэм зыхуагъэувыжа мурадхэр къайхъулIащ, гъатхэсэри бжьыхьэсэри уэгъум кърагъэлащ. Ауэ…

ЦIыхухэм сытым дежи ящIэр нэхъыбэщ. Накъыгъэмрэ мэкъуауэгъуэмрэ къриубыдэу, илъэсым къешхыпхъэ уэшхым и процент 80-р уафэм зэрыхуэмыIыгъыжыр щалъагъум, Ставрополь крайм щекIуэкIахэр зылъэгъуахэмрэ Iуэхур зыIут дыдэр зэрамыщIэмрэ зэхалъхьэжри, гъэмахуэ уэлбанэрилэр зи гугъу тщIа кхъухьлъатэм тралъхьэн щIадзащ. Аращ Ишковыр къэмыпсалъэу щIэмыхъуар. Министрым пресс-конференц зэхуишэсри, щытыкIэр къагуригъэIуащ: «Росгидромет»-м и кхъухьлъатэр Ставрополь крайм щыIэжкъым, уеблэмэ и лэжьыгъэр зэфIигъэкIыу щIыналъэр зэрибгынэрэ мазэ бжыгъэ хъуащ. Пэжщ, ар щIыуэпсым Iэмал щхьэхуэкIэ ебгъэрыкIуэу уэшх кърагъэшхын папщIэт къыщIраджар. Ауэ мэлыжьыхь лъандэрэ ар Ставрополь крайм и Iэгъуэблагъэм икIыжащ.

«ХъыбарегъэщIапIэхэр къызэрызэIупхыу, псори зи лажьэр а кхъухьлъатэращ жаIэри, гупсысэнуи хуеижхэкъым, - жиIащ Ишковым. - Кхъухьлъатэм ищIэнур ищIэри лъэтэжакIэщ». Ар къызэрашам и фIыгъэкIэ гъавэр мэбагъуэ, уеблэмэ гъунэгъу щIыналъэхэми щапхъэ трахын я мураду. Пэжщ, щIыр егъэлеяуэ псыIэ зэрыхъуар нэрылъагъущ, уеблэмэ комбайнхэмрэ тракторхэмрэ губгъуэм щимыхьэф къахуохуэ. Ауэ, итIани, ар езы щIыуэпсым и щытыкIэращ къызэрыкIар, цIыхур зэрыхэIэбаракъым, министрым зэрыжиIэмкIэ. Пресс-конференцым «фосфогипс» жыхуаIэ пкъыгъуэм и гугъу щащIащ, абы щIым и псыIагъым хегъэщI. ИтIани, псы куэдыIуэр нэхъыфIщ гъавэм дежкIэ, мащIэIуэм нэхърэ. Пшэхэр зэрызэбграху щIыкIэми зрагъэсэну хьэзырщ IэщIагъэлIхэр. А псом нэхърэ нэхъ шынагъуэщ щIым и IэфIыр щIэкIыу, ар къэбгъэщхьэпэ мыхъужыххэным ухуишэнкIи зэрыхъунур. Псы уримыкъунри нэхъ бэлыхьышхуэщ, уэшх куэдыIуэ къешхыным елъытауэ. Мэкъумэшым елэжь къулыкъущIэхэр а псоми хуосакъ, щIэныгъэр къагъэсэбэпурэ кIэлъоплъ.

Профессор, физико-математикэ щIэныгъэхэмкIэ доктор Закинян Роберт зэрыжиIэмкIэ, цIыхур щIыуэпсым кIэлъыплъу, къэхъупхъэ гуэрхэр и нэгум къыщIигъэхьэфу зригъэсауэ щытми, нэхъыбэр хуэгъэфэщэныгъэу къонэ. И хьэтыр лъагъупхъэщ дунейр зэрыщыту нэхъ пщтыр хъуауэ къызэралъытэми. АбыкIэ езы цIыхум фIэкIа зыри пхуэгъэкъуэншэнукъым. КIуэ пэтми, углекислый газ нэхъыбэ щIыуэпсым хаутIыпщхьэ. А псом дунейр хуабэщым ещхьу уэм ещI. НэхъыфI дыдэу ЩIылъэм пхуехьэлIэнур уи зэраныгъэ иумыгъэкIынырщ. Уэшхрилэ зэрыхъум нэхърэ нэхъ гузэвэгъуэ куэди щыIэщ. Илъэсым гъавэ бэвкIэ дыщыгугъынщ.