Бадзэуэгъуэм и 25-р сатуущIэхэм я махуэу Урысей Федерацэм зэрыщагъэувам ипкъ иткIэ ягъэлъапIэ. А махуэр Совет къэралыгъуэми илъэс куэдкIэ щаIэтащ.
УФ-м и Президентым къыдигъэкIа унафэ № 459-м ипкъ иткIэ, 2013 гъэм зэфIагъэувэжащ сатуущIэхэм я махуэщIыр гъэлъэпIэныр. Ар трагъахуэ бадзэуэгъуэ мазэм и еплIанэ щэбэтым.
СатуущIэхэм я махуэм ехьэлIа дауэдапщэр ехьэжьауэ ящIыркъым, екIурабгъуу къызэрагъэпэщ. Псалъэм папщIэ, тыкуэнышхуэ зиIэхэр, зи лэжьэкIэр зэтеувауэ сату Iуэхум нэхъ щехъулIэхэр ягъэлажьэхэм йохъуэхъу, къыхуагъэфэща IэнатIэм щхьэх зымыщIэу бгъэдэтхэм саугъэтхэмрэ щIыхь тхылъхэмрэ ират. Къалэхэм, къуажэхэм дэт тыкуэнхэм жэрмыкIэхэр къызэрагъэпэщ, хьэпшыпрэ ерыскъыхэкIыу ящэхэм я уасэм а махуэм кIэрагъэху. ХьэрычэтыщIэхэр мы махуэм зыр адрейм йохъуэхъу, псалъэ дахэ зэжраIэ.
Языныкъуэ къэралхэм махуэщIыр мазэ зэхуэмыдэхэм трагъахуэ. Псалъэм папщIэ, хьэрычэт цIыкIумрэ курытымрэ я махуэр мэкъуауэгъуэм и 27-м хуагъазэ.
Сату щIыныр игъащIэм цIыхухэм къадекIуэкI Iуэхущ. Арыншамэ, экономикэм зиужьынутэкъым, къэралхэм псэукIэщIэхэри къыщыунэхунутэкъым.
Тхыдэм и щIэин зэмылIэужьыгъуэхэм къызэрагъэлъэгъуэжымкIэ, сату Iуэхум япэ дыдэу иужь щихьар илъэс миниплI ипэкIэщ. Щэн-къэщэхуныр а зэманым зэрызрагъэкIуэкIыу щытар бдзапцIэ, щэкI, дыщэ, дыжьын хуэдэхэмкIэ зэхъуажэурэщ. Iуэхум и къекIуэкIыкIэр ятIагъуэм къыхащIы-кIа тхылъхэм иратхэрт.
Шхынхэлъхьэхэмрэ дарий щэкIхэмрэ лъыхъуэнырщ къызыхэкIар алъандэрэ щыIэми-щымыIэми зыхамыщIыкIа щIыналъэхэр цIыхум къэхутэныр, ахэм сату дащIу зэтраублэныр.
Урысхэм «продавец» псалъэр къагъэсэбэп щыхъуар епщыкIубгъуанэ лIэщIыгъуэрщ, урысейм тыкуэнышхуэхэр, универмагхэр къыщызэIуахын щыщIадза лъэхъэнэрщ.
КъызэрагъэлъэгъуамкIэ, дуней псом нэхъ ин дыдэу ит тыкуэныр здэщыIэр Дубай къалэращ, абы махуэм хуэзэу цIыху мин 80-м щIигъу йокIуалIэ.
НЭЗРЭН Раисэ.
