Уасэхэм дащIыкIэщIэмыхьэр

«Зэманым декIур лIыфIщ» - жыхуиIэращ. АтIэ, мис апхуэдэу зэманым зыщихъуэжым, лэжьыгъэ зымыгъуэту къэна цIыхухэм бэзэрыр я хэкIыпIэ хъуащ. ЛъэхъэнэщIэм къыдэунэхуа жармыкIэ-бэзэр хьэрычэтыр цIыхубзхэм нэхъ къехъулIэу къыщIэкIащ, ди нэгу зэрыщIэкIщи.

«Улахуэр и чэзум къыдату IэнатIэ гуэр дыIуту щытамэ нэхъыфIт», - бэзэрым тетхэм ящыщу апхуэдэу жызыIэри мащIэкъым. Лэжьыгъэ къэзыгъуэту къытекIыжахэри щыIэщ. Мыдрейхэр, унагъуэр зыхагъэпсэукIыфын хуэдиз улахуэ къыщахьыфын лэжьапIэ къызэрамыгъуэтыфым къыхэкIыу, бэзэрым къытонэ.

Зы зэман абы ахъшэфI къытрахыу зэрыжаIэр пэжынущ, ауэ Интернетым къыщежьа IэмалыщIэмкIэ цIыхухэр зыхуей-зыхуэныкъуэ куэдыр къащэхуф хъуащи, бэзэрхэм тетхэм къахэхъуэм кIэрыхуу макIуэ.

Къуажэдэсхэм Iэщ, джэд-къаз, хадэхэкI сыт хуэдэхэмкIэ зыгуэр зрагъэкIуэкIми, ахэри егъэтхьэусыхэ уасэхэр зэрыхэхъуэм. Лэжьыгъэм къарууэ тебгъэкIуадэмрэ абы къыпэкIуамрэ щызэпэплъыткIэ, уеблэмэ уи щхьэм мыгъуагъэ зэрыхуэпхьыжыр жаIэ.

Ди къэралыр гугъуехьышхуэ пэщIэтщ иужьрей илъэсиплIым. Дунейр къыщоныкъуэкъукIэ, цIыхухэм ар зыхамыщIэу къанэркъым. Дыщыгугъынщ лэжьыгъэм щымышынэ  цIыхум и щхьэ игъэпсэужыфу щыхъуну зэманыр мыжыжьэу.    

КЪАНКЪУЛ Раисэ.