Къызыхуэтыншэу, зыхуей псомкIи къызэгъэпэщауэ

ШколакIуэхэм я гъэмахуэ зыгъэпсэхугъуэ лъэхъэнэм,  сыт щыгъуи хуэдэу,  еджапIэхэм щокIуэкI ухуэныгъэ-зэгъэпэщыжыныгъэхэр. Апхуэдэу Бахъсэн щIыналъэм хыхьэ  курыт школхэми щIэгъэхуэбжьауэ щокIуэкI еджапIэхэмрэ гъэсапIэхэмрэ гъэ еджэгъуэщIэм хуэгъэхьэзырыжыным хуэгъэпса лэжьыгъэхэр.

Зеикъуэ  къуажэшхуэм дэт курыт еджапIэ №3-ри ящыщщ ухуэныгъэ-зэгъэпэщыжыныгъэ лэжьыгъэшхуэхэр щрагъэкIуэкIхэм.  Ахэр зэфIах «Егъэджэныгъэм зегъэужьын»  федеральнэ программэм ипкъ иткIэ. 

Бахъсэн щIыналъэм и администрацэм и пресс-IэнатIэм хъыбар къызэритамкIэ, ныбжьыщIэ 460-рэ щеджэ а IуэхущIапIэр метр зэбгъузэнатIэ мин 330-рэ мэхъу. Ар зэраухуэрэ блэкIа илъэс щэ ныкъуэм  щIигъум къриубыдэу иджы япэу апхуэдэ лэжьыгъэшхуэхэр ирахьэлIэу аращ. УхуакIуэхэм къагъэщIэрэщIэж унэшхуэм и теплъэр, школым и кIуэцIри, и щIыбри зэпэщ ящI, иджырей мардэхэм хуэкIуэ ухуэныгъэ пкъыгъуэхэр ирахьэлIэурэ.  Мы зэманым и кIэм нос унащхьэр щIэкIэ зэхъуэкIыным, щхьэгъубжэщIэхэмрэ бжэщIэхэмрэ хэгъэувэным ехьэлIа лэжьыгъэхэр. Абыхэм къадэкIуэу, школым и кIуэцIым щызэбграш инженер-коммуникацэщIэхэр.

Апхуэдэу ухуакIуэхэм школым лъэгущIэхэр ирадзынущ, псы хуабэмрэ щIыIэмрэ зэрыкIуэ бжьамийхэр яхъуэжынущ, школым и пэшхэри кIэлындорхэри къанэ щымыIэу зыхуей хуагъэзэнущ,  еджапIэм и щIыбри екIуу зэрахьэнущ,  абы и Iэшэлъашэри  екIуу зэрагъэпэщынущ. Школым и классхэмрэ предмет хэхахэр щаджыну пэшхэмрэ зыхуей-зыхуэныкъуэ IэмэпсымэхэмкIи унэлъащIэхэмкIи къызэрагъэпэщынущ. 

ЩIыналъэм унафэр щызезыгъакIуэ къулыкъущIэхэр набдзэгубдзаплъэу кIэлъоплъ еджапIэм лэжьыгъэхэр зэрыщекIуэкIым, а Iуэхум теухуауэ ахэр яхуозэ школым и унафэщIхэмрэ ухуэныгъэ-зэгъэпэщыжыныгъэ лэжьыгъэхэр зэфIэзыгъэкIыну зи пщэрылъ IэщIагъэлIхэмрэ.  Мы зэманым школым ирашэлIащ  зыхуеину ухуэныгъэ пкъыгъуэхэр. Лэжьыгъэхэри къызыхуэтыншэу зэтраублащ. 

 Ухуэныгъэ-зэгъэпэщыжыныгъэ лэжьыгъэхэр фIагъ лъагэ яIэу икIи и чэзум зэрызэфIагъэкIыным хущIокъу ухуакIуэхэри щIыпIэ унафэщIхэри.  Псори зыхуэунэтIар ныбжьыщIэхэр сыт и лъэныкъуэкIи зэпэщ, зыхуей хуэгъэзэжа, зыхуэныкъуэ псомкIи къызэгъэпэща еджапIэм   екIуэлIэжынырщ, щIэблэм щIэныгъэфIрэ гъэсэныгъэ екIурэ егъэгъуэтынырщ. 

ТАМБИЙ Линэ.