Узыфэ зэмылIэужьыгъуэхэр зыпкърытхэм щеIэзэ республикэ сабий сымаджэщым къыIэрыхьащ иджырей медицинэ техникэу 70. А Iуэхур ягъэзэщIащ «Унагъуэ» лъэпкъ проектым хыхьэ «Анагъэмрэ сабиигъуэмрэ» программэм ипкъ иткIэ.
IэмэпсымэхэмкIэ къызэрагъэпэщащ реанимацэ, хирургие пэшхэр. АбыхэмкIэ узыфэр зыхуэдэр куэдкIэ нэхъ тыншу къахуэхутэнущ икIи зэреIэзэ Iэмалхэми къахигъэхъуэнущ. Апхуэдэ Iэмэпсымэ зэхэт къазэрыIэрыхьар республикэм и сабийхэм ягъуэт медицинэ дэIэпыкъуныгъэм зегъэужьынымкIэ мыхьэнэшхуэ зиIэ лъэбакъуэщ, абы и фIыгъэкIи сымаджэхэм зэреIэзэм и фIагъми шынагъуэншагъэми хэхъуэнущ.
Иджы республикэм ӏэмал иӏэщ сабийхэр нэгъуэщӏ щӏыналъэхэм имыгъакӏуэу щӏыпӏэм сыт и лъэныкъуэкIи зыхуэныкъуэ дэӏэпыкъуныгъэр щыхуащIэну. Абы унагъуэр зыхэт гугъуехьри нэхъ мащIэ ищIынущ, сабийми и узым и Iэзэгъуэр нэхъ псынщIэу игъуэтынущ.
IэмэпсымэщIэхэм IэнатIэм къыхалъхьэну бгъэдыхьэкIэщIэхэм тету операцэ ящIхэм къахигъэхъуэнущ, сымаджэ нэхъыби ягъэхъужыну Iэмал къаритынущ.
* * *
ЩIыналъэхэр зэрызэдэлажьэм ипкъ иткIэ, апхуэдэуи УФ-м Узыншагъэр хъумэнымкIэ и министерствэм и жэрдэмкIэ Осетие Ипщэ Республикэм и лIыкIуэ гуп КъБР-м узыншагъэр хъумэнымкIэ и медицинэ IуэхущIапIэхэм щыIащ. Апхуэдэ зэкIэлъыкIуэр зытеухуар Iэмал нэхъыфIхэм зыхагъэгъуэзэнымрэ медицинэ дэIэпыкъуныгъэр къызэрызэрагъэпэщым и IуэхукIэ зэчэнджэщынымрэщ.
ЛIыкIуэхэр щыIащ республикэм и медицинэ IуэхущIапIэ нэхъыщхьэхэм. Республикэ клиникэ сымаджэщым абыхэм зыщыхагъэгъуэзащ пIэщIэгъуэкIэ дэIэпыкъуныгъэ хуэныкъуэхэм ар зэрыратым, узыр къэхутэным епхауэ IэнатIэм щыIэ IэмалыщIэхэм, медицинэ реабилитацэр зэрырагъэкIуэкIым. Гулъытэ щхьэхуэ хуащIащ фIагъым и менеджментымрэ медицинэ Iуэхутхьэбзэхэм я шынагъуэншагъэмрэ.
Налшык дэт поликлиникэ №1-м хьэщIэхэр щыкIэлъыплъащ лэжьыгъэр къызэрызэгъэпэщам, япэ медико-санитар дэIэпыкъуныгъэхэр зэрыхуащIэм, апхуэдэуи зрагъэщIащ абы щагъэзащIэ IуэхущIэхэр зыхуэдэр.
Осетие Ипщэм къикIа медицинэ IэщIагъэлIхэр тепсэлъыхьащ я щIыналъэм узыншагъэр хъумэнымкIэ и IэнатIэм щекIуэкI лэжьыгъэм.
IэщIагъэлIхэм къыхагъэщащ медицинэ лэжьакIуэхэм я Iэзагъэм хэгъэхъуэнымкIэ, щIыналъэхэм щыIэ медицинэ дэIэпыкъуныгъэр егъэфIэкIуэнымкIэ мыпхуэдэ зэхыхьэхэм мыхьэнэшхуэ зэраIэр.
* * *
УФ-м Узыншагъэр хъумэнымкIэ и министерствэм иригъэкIуэкIа зэIущIэм Урысейм и Правительствэм и УнафэщIым и къуэдзэ Голиковэ Татьянэ щыжиIащ лъэпкъ проектхэр гъэзэщIэнымкIэ Къэбэрдей-Балъкъэрыр пашэу къалъыта щIыналъипщIым зэращыщыр.
Вице-премьерым къызэрыхигъэщамкIэ, лъэпкъ проектхэм къагъэувхэр нэсу щызрагъэхъулIащ Москва, Санкт-Петербург, Севастополь къалэхэм, Калининград, Калугэ, Мурманск, Псков, Тулэ, Тюмень щIыналъэхэм, Мордовие, Тэтэрстан, Кърым, Шэшэн, Къэбэрдей-Балъкъэр республикэхэм, апхуэдэу Ямало-Ненецкэ автоном округым.
Лъэпкъ проектхэм къыщыгъэлъэгъуахэм ящыщу мыхьэнэ нэхъ ириту Голиковэм къихигъэщащ цIыхухэр нэхъ гъащIэ кIыхь, къалъхуагъащIэ сабийуэ дунейм ехыжхэм я бжыгъэр нэхъ мащIэ зэрыхъуар.
Апхуэдэу жиIащ балигъхэмрэ сабийхэмрэ я узыншагъэр къэпщытэнымкIэ, къалъхуагъащIэхэм япкърыт узыфэр къэхутэнымкIэ, узыншагъэр хъумэнымкIэ IуэхущIапIэхэр ухуэнымкIэ, зыхуей хуэгъэзэжынымкIэ, зыхуэныкъуэ IэмэпсымэхэмкIэ къызэгъэпэщынымкIэ, санитар автотранспортхэр къэщэхунымкIэ лэжьыгъэшхуэ зэрырагъэкIуэкIыр.
«Медицинэ IуэхущIапIэхэр зыпэрыт IэнатIэм фIыуэ хэзыщIыкI IэщагъэлIхэмкIэ къызэгъэпэщыныр лъэпкъ проектхэм къыщыгъэлъэгъуа унэтIыныгъэ нэхъыщхьэу къонэж. Апхуэдэу узыншагъэр хъумэнымкIэ IэнатIэм бжыгъэ технологиехэр къыщагъэсэбэпыным нэхъ жыджэру иужь итыпхъэщ, телемедицинэм зегъэужьынми мыхьэнэшхуэ иIэщ», - жиIащ Голиковэ Татьянэ.
* * *
Республикэм и психоневрологие центрыр къэгъэщIэрэщIэжыным, абы и къудамэщIэхэр ухуэным теухуауэ ирагъэкIуэкI лэжьыгъэхэм адэкIи къыпащэ.
Мы зэманым IуэхущIапIэм и пщэфIапIэм и унэщIэр яухуэ. Апхуэдэу цIыхухъухэр здэщыIэ къудамэм зэгъэпэщыжыныгъэр щрагъэкIуэкI. НэхъапэкIэ сабий къудамэр зыхуей хуагъэзэжащ.
Республикэ бюджетым къыхэкIыу мы проектым хухахащ сом мелуани 135-м щIигъу. Лэжьыгъэр 2027 гъэм икухэм деж яухыну я мурадщ.
