И лэжьыгъэ зехьэкIэкIи, и цIыхугъэкIи щапхъэт

Къэбэрдей-Балъкъэрым щIыхь зиIэ и дохутыр, медицинэ щIэныгъэхэмкIэ кандидат, категорие нэхъыщхьэ зиIэ Бырхьэм Анатолэ илъэс 50-м щIигъукIэ и IэщIагъэм хуэпэжу лэжьащ. А зэманым къриубыдэу, шэч хэмылъу, ар цIыху куэдым сэбэп яхуэхъуащ, гукъыдэжрэ дэрэжэгъуэрэ яIэу гъащIэм хигъэплъэжащ. Бырхьэмыр зыцIыхухэм зэрыжаIэмкIэ, къэхъуакъым абы IуэхукIэ бгъэдыхьа щигъэщIэхъуа: зэрыхузэфIэкIкIэ дэтхэнэми дэIэпыкъуащ.

- Хущхъуэм и мыхьэнэм нэхърэ нэхъ мащIэкъым сымаджэм дежкIэ дохутырым и псалъэхэм я къарур, – жиIэрт Бырхьэм Анатолэ. – Сымаджэм фIэщхъуныгъэ хэплъхьэфмэ, ар уи къалэным щыщ Iыхьэшхуэ бгъэзэщIауэ аращ. Узым къигъэдзыхэ цIыхур тэмакъкIэщI, гурыщхъуэщI мэхъу, абы къыхэкIыу Iэмал имыIэу щабэу епсэлъэн, бгъэдыхьэкIэ щхьэхуэ къыхуэгъуэтын хуейщ. Iэзагъым къыдэкIуэу, дохутырым Iэмал имыIэу шыIэ хэлъыпхъэщ.
Бырхьэмыр зэрысабийрэ щIэхъуэпсырт дохутыр IэщIагъэм икIи, и насып кърихьэкIри, и мурадыр зригъэхъулIащ. ЕджапIэ нэхъыщхьэм щыщIэсам, лекцэхэм къыщищIэм нэмыщIкIи, къыхиха IэщIагъэм и щэхухэр зригъэщIэн мурадкIэ, тхьэмахуэ махуэхэм Республикэ клиникэ сымаджэщым щылажьэрт. ИужькIи а хьэлыфIыр IэщIыб ищIакъым, сытым дежи и IэщIагъэм теухуауэ щIэ гуэрхэр къызэрищIэным хуэпабгъэу щытащ.
- Дохутырым зэпыу имыIэу и щIэныгъэм хигъэхъуэн хуейщ, – жиIэрт Анатолэ. – Медицинэр и пIэ иткъым, абы къызэрымыкIуэу зеужьри, езым и IэщIагъэм епхауэ щIэуэ сыт дунейм къыщыхъуми щыгъуэзэн хуейщ.
ЕджапIэ нэхъыщхьэр къиуха нэужь, Бырхьэмым Налшык дэт медицинэ IуэхущIапIэхэм ящыщ зым къэнэну Iэмал иIащ, арщхьэкIэ Ислъэмей къуажэм дэт сымаджэщыр къыщыхуагъэлъагъуэм, абы дохутыр нэхъыщхьэу лэжьэн щыщIидзащ. Лэжьыгъэм пэрыувагъащIэми, гугъуехьым къригъэкIуэтакъым, и зэфIэкIыр абдежым къыщызыкъуихащ, пIалъэ кIэщIым къриубыдэу абы и щытхъур жылэм щыIуащ.
Илъэсрэ ныкъуэкIэ абы щылэжьауэ, Бырхьэм Анатолэ Бахъсэн район сымаджэщым и терапие къудамэм и унафэщIу ягъэуващ. Лэжьыгъэр и чэзум, нэгъэсауэ зэрызэфIихым псынщIэу гу лъатэри, Анатолэ сымаджэщым и дохутыр нэхъыщхьэм и къуэдзэ ящIащ. ИужькIэ дохутыр нэхъыщхьэм и къалэнхэри пщэрылъ къыщащIащ. ПщIэрэ щIыхьрэ иIэу а IэнатIэ гугъум ар илъэс 15-кIэ пэрытащ.
Бырхьэмыр зыхэт гупым я дежкIэ сыткIи щапхъэт: и лэжьыгъэ зехьэкIэкIи, и цIыхугъэкIи. Зи унафэщI сымаджэщым и дэтхэнэ IэнатIэми щекIуэкIыр ищIэрт, абы щылажьэ цIыхухэми я Iуэху зыIутым щыгъуазэт. Дэтхэнэми IуэхукIи чэнджэщкIи дэIэпыкъуэгъу яхуэхъурт. Дохутыр IэщIагъэр къыхэзыха щIалэгъуалэ куэди гъуэгу захуэ тригъэуващ абы.