Жылагъуэ транспортым къыхохъуэ

Къэбэрдей-Балъкъэрым и унафэщIхэр набдзэгубдзаплъэу кIэлъоплъ жылагъуэ транспортым и лэжьыгъэр нэхъри егъэфIэкIуэным, цIыхухэр къезышэкI автобусыщIэхэр зы­Iэрыгъэхьэным. Жылагъуэм и дежкIэ мыхьэнэшхуэ зиIэ а Iуэхугъуэм теухуауэ КъБР-м и Iэтащхьэ КIуэкIуэ Казбек МАХ-м щиIэ напэкIуэцIым щетх:

«Упсэун папщIэ Iэмалхэр» лъэпкъ пэхуэщIэм ипкъ иткIэ ­гъуэгухэм цIыхухэр къыщрашэкIыну трагъэувэну республикэм къахуащ «ПАЗ Вектор NEXT» автобусыщIэу 16. Ахэр трагуэшэнущ къалащхьэм и хьэблэхэр зэпызыщIэ гъуэгухэм. Автобусым тIысыпIэ 23-рэ иIэщ, псори зэхэту абы ихуэнущ цIыху 65-рэ. Къыхэгъэщыпхъэщ автобусыщIэхэр кондиционерхэмкIэ, зи узыншагъэм сэкъат иIэ цIыхухэм хуэщIа дэкIуеипIэхэри тIы­сыпIэхэри иIэу къызэрызэгъэпэщар. 
Иджыпсту техникэщIэр «Налшык транспорт» IуэхущIапIэм и пщIантIэм дэтщ, гъуэгу техьэным хуагъэхьэзыру. Автобусхэр ­видеокIэлъыплъыныгъэкIэ къызэрагъэпэщ, ахэр ГЛОНАСС-м пыщIауэ щытынущ, гъуэгупщIэри, шоферыр умыгъэпIейтейуэ, терминалхэмкIэ нэхъ тыншу щыпхуэтыным хуащI. А псори къызыхуэтыншэу зэфIэха хъуа нэужь, автобусхэр гъуэгухэм трагъэувэнущ. 
Абыхэм лэжьэн щIадзэмэ, шэч хэмылъу, къалащхьэм щыпсэухэр, абы и хьэщIэхэр къешэкIыным епха Iуэхухэр нэхъри ефIэкIуэнущ, гъуэгухэри нэхъ шынагъуэншэ хъунущ. 
Апхуэдэ лэжьыгъэхэм дяпэкIи пытщэнущ».