Темыркъаным и пшыхьхэр

КъБР-м и Музыкэ къэрал театрым мы махуэхэм щызэхуащIыжащ симфоние музыкэмкIэ «Темыркъаным и пшыхьхэр» фестивалыр. Ар къызэрагъэпэщащ СССР-м, РСФСР-м, ­КъБР-м я цIыхубэ артист, Совет Союзымрэ Урысей Федерацэмрэ я къэрал саугъэтхэм я ­лауреат, Санкт-Петербург щIыхь зиIэ и цIыху, а къалэм и филармонием и Академическэ ­симфоние оркестрым и художественнэ уна­фэщIу щыта дирижёр цIэрыIуэ Темыркъан  Юрэ и фэеплъу. Iуэхур КъБР-м ЩэнхабзэмкIэ и министерствэм къызэригъэпэщащ, УФ-м ЩэнхабзэмкIэ и министерствэр и дэIэпыкъуэгъуу.

Зэраубзыхуам тету, налшыкдэсхэмрэ ди ­хьэ­щIэхэмрэ гъэ къэс зэхуэзышэс мы фестивалыр бадзэуэгъуэм и кIэхэм ирагъэжьащ икIи шыщ­хьэуIум и пэхэм пщIондэ екIуэкIащ. Iуэху ­гуапэм хыхьэу къызэрагъэпэща пшыхьхэм цIыхушхуэ зэхуашэсащ икIи щIэщыгъуэ ящы­хъуащ. 
Музыкэ театрым и пэIущIэ пэшым щагъэуват Темыркъаным и гъащIэмрэ гуащIэмрэ теухуа тхылъхэмрэ сурэтхэмрэ.
Концертым и программэм хыхьэу къагъэ­лъэгъуэ­жащ маэстрэм и архивым щыщу яхъумэ концертхэм, Санкт-Петербург къалэм Шоста­кович Дмитрий и цIэр зезыхьэ и филармонием       и Академическэ симфоние оркестрым ита концертхэм щыщ. Къэбэрдейр Урысейм зэрыгухьэрэ илъэс 400 зэрырикъум и щIыхькIэ Налшык иIэ утыкум махуитIым къриубыдэу щагъэ­лъэгъуащ Темыркъан Юрэ и концертхэу дэфтэр хъумапIэхэм щIэлъхэм щыщ. Классикэ макъамэ фIыуэ зылъагъу къалэдэсхэм щIэщыгъуэ ящы­хъуащ ахэр.
Музыкэ къэрал театрым и утыкум зыкъыщагъэлъэгъуащ Темыркъан Юрэ илъэс 35-кIэ и унафэм щIэта, Санкт-Петербург къалэм Шоста­кович Дмитрий и цIэр зезыхьэ и филармонием и Академическэ симфоние оркестрым. Япэ пшыхьым и дирижёру щытащ дунейпсо ­зэпеуэ- хэм я лауреат Забояркин Ярославрэ ­КъБР-м и Музыкэ къэрал театрым и дирижёр ­нэхъыщхьэ Лэкъун Азэмэтрэ. Фестивалым и ­етIуанэ махуэм концертыр ирагъэкIуэкIащ дунейпсо зэпеуэм и лауреат Ньягэ Алексейрэ ­Лэкъун Азэмэтрэ. Концертыр ягъэдэхащ УФ-м и цIыхубэ артист Клычков Лев, концертмейстерхэу Козлов Илья, Рыжков Евгений, виолончелистхэу Зубарёв Никитэрэ Измайлов Ильярэ, кларнетист Лютиков Никитэ, флейтэ еуэ Тертычная Олеся. Куэдым ягу дыхьащ   хыхьэу ягъэзэщIа, КъБР-м и цIыхубэ артист Рас­теряев Игорь и «Къэбэрдей къафэр». Урыс, хамэ къэрал ком­позитор куэдым я IэдакъэщIэкIхэм щыщ кон­цертым зэрыщыIуам пшы­хьыр ягъэ­беящ, щIэ­щыгъуи ящIащ. 

ТЕКIУЖЬ Заретэ. 
Сурэтхэр Къарей Элинэ трихащ.