ГъэщIэгъуэнщ икIи щхьэпэщ

КъБР-м ЦIыхубэ IэпщIэлъапщIагъэм­рэ IэпэIэсагъэмкIэ и центрым щагъэлъа­гъуэ декоративно-прикладной гъуазджэм щыщ лэжьыгъэхэр. Президент фон­дым и грантыр и дэIэпыкъуэгъуу къызэрагъэпэщащ гъащIэр узыншэу ехьэкIыным телажьэ «Анна» валеологие клубым и щIыналъэ къудамэм хэтхэм. КъБР-м Лъэпкъ Iуэхухэмрэ жылагъуэ проектхэмкIэ и министерствэм и субсидие къэхьынымкIэ республикэ зэпеуэм зэрыщытекIуам апхуэдэ Iэмал къаритауэ аращ. Жэрдэмыр зейр «Анна» клу­бым и щIыналъэ къудамэм и унафэщI Жиздюк Маринэщ.

IэпщIэлъапщIэ, егъэджакIуэ Мысачэ Верэ и унафэм щIэт IэпэIэсэхэм я лэ­жьыгъэ гъэщIэгъуэнхэр утыку кърахьащ. Гъэлъэгъуэныгъэм унэтIыныгъэ зэмы­лIэу­жьыгъуэхэм щыщ лэжьыгъэхэр къы­зэщIеубыдэ. Абы щыболъагъу цыкIэ зэIу­ща гуащэхэр, сумкэхэр, къэлътмакъ­хэр, тхылъымпIэм, щэкIым къыхэщIыкIа удз гъэгъахэр, гъащIэм узыщрихьэлIэ теп­лъэгъуэхэр къызытещ сурэтхэр. Выставкэм зрезыгъэхьэлIахэм лэжьыгъэхэр ягу дыхьащ. ЖыпIэнурамэ, IуэхущIапIэм и пэшри щIэщыгъуэ пщыхъурт, абы щагъэува сурэтхэмрэ хьэпшыпхэмрэ апхуэдизкIэ телъыджэти. 
Iуэхур къыхалъхьащ ди нэхъыжь IэпщIэ­лъапщIэхэм я зэфIэкIхэр нэхъри къызэ­къуахын, дэзыхьэх лэжьыгъэм иджыри трагъэгушхуэн, я щыIэкIэ-псэукIэр ира­гъэ­фIэкIуэн папщIэ. 
КъБР-м лъэпкъ Iуэхухэмрэ жылагъуэ проектхэмкIэ и министерствэм и къудамэм и унафэщI Куэцэ Эльберд и псалъэм къыхигъэщащ клубым хэтхэм я лэжьыгъэхэм илъэс етIуанэ хъуауэ зэры­кIэ­лъыплъыр, мы IуэхущIапIэм щрагъэблагъэкIэ сыт щыгъуи фIэфIу къызэрыкIуэр, IэпщIэлъапщIэхэм гъэ къэс зэрызаужьыр я IэрыкIхэмкIэ зэрынэрылъагъур, абыхэм я бжыгъэм зэрыхэхъуами гу зэрылъитар. Абы щIигъужащ Президент грантхэмкIэ фондым и саугъэтыр илъэситI хъуауэ зэ­кIэ­лъхьэужьу къызэрыхуагъэфащэр клу­бым и унафэщI, жэуаплыныгъэ ин пылъу зи IэнатIэм пэрыт Жиздюк Маринэ зэрифIыщIэр. ХьэщIэм къыхигъэщащ езыр зи лIыкIуэ министерствэм нэхъыжьхэм пщIэрэ гулъытэрэ зэрахуищIыр, Iуэху гъэ­щIэгъуэн куэд цIыхухэм зэрадиIыгъыр, псэгъэгуфIэ-дахагъэ зыхэлъ мы зэхы­хьэ­ри абыхэм зэращыщыр, нэхъыжьхэм я узын­шагъэр егъэфIэкIуэным теухуа программи зэрагъэхьэзырар, сыт щыгъуи цент­рым дэIэпыкъуну, дэлэжьэну зэ­ры­хьэ­зырыр, дяпэкIи заужьыну, ефIэкIуэну зэригуапэр. 
КъБР-м и сату-промышленнэ палатэм и уна­фэщI ГъукIэлI Хьэсэн клубым и уна­фэ­щIымрэ абы хэтхэмрэ ехъуэхъуащ я лэжьыгъэхэм я фIагъыр къызэралъытам папщIэ. Абы къыхигъэщащ клубым щIэх-щIэхыурэ къызэрыкIуэр, я IуэхущIапIэр центрым дэлэжьэну, хуей щыхъукIэ Iэп­щIэлъапщIэхэм сыт щыгъуи ядэIэпыкъуну зэрыхьэзырыр. ГъукIэлIыр IэпэIэсэ­хэм ехъуэхъуащ узыншагъэрэ ехъулIэныгъэрэ яIэну, я зэфIэкIхэм хагъэхъуэну, нэхъри заужьыну.
КъБР-м щэнхабзэмкIэ и министрым и къуэдзэ Мизиев Iэубэчыр жиIащ гъэлъэгъуэныгъэ-жармыкIэм хыхьэу, республикэм щыпсэу, зэфIэкI зиIэ нэхъыжьыфIхэм я лэжьыгъэ щIэщыгъуэхэр игу зэрырихьар. Абы къыхигъэщащ мыпхуэдэ Iуэху­хэм мыхьэнэшхуэ зэраIэр, гъуазджэм ­цIы­хухэр нэхъри зэрызэкъуигъэувэр, Iэп­щIэ­лъапщIэхэм гъащIэ кIыхь хъуну ехъуэ­хъуащ икIи фIыщIэ яхуищIащ, пасэрей цIыхубэ IэщIагъэ дахэр зэрахъумэмрэ я IэдакъэщIэкIхэр зэрыкупщIафIэмрэ папщIэ. 
- Президент фондым и грантыр къы­зэрытхьам и фIыгъэкIэ, илъэс ныкъуэкIэ узэIэбэкIыжмэ иужь дихьащ «Сотворчест­во» Iуэхум. «Анна» клубым хэтщ илъэс ­55-м къыщыщIэдза нэхъыжь бзылъхугъэ 45-рэ. Гупым екIуалIэхэр зы унагъуэшхуэм хуэдэу зэкъуэтщ, зыр адрейм дэIэпы­къуэгъу хуэхъуу. IэпэIэсагъэм и мыза­къуэу, цIы­хубзхэр ныбжьэгъу дызэрыгъэхъуауэ зэман къыщытхудэхуэкIэ дызопсалъэ, спорт­ми къафэми гулъытэ худощI, зы­гъэпсэхупIэхэм докIуэ, ди нэгу зыдогъэужь, - жиIащ Мысачэ Верэ. – Илъэс ныкъуэм къриубыдэу къетхьэлIа лэжьыгъэхэр фигу дыхьамэ, ди гуапэщ! 
- КъБР-м ЩэнхабзэмкIэ и министерст­вэмрэ Налшык къалэ администрацэмрэ я фIыгъэкIэ, Мысачэ Верэ щылэжьэну, IэпщIэлъапщIагъэм щыхуигъэсэну пэш хухахащ. Абы екIуалIэ хъунущ пенсэм кIуа нэхъыжьхэр, апхуэдэ лэжьыгъэм гупыж хуэзыщI псори. Сурэтхэр, алэрыбгъу­хэр, нэгъуэщI гъуазджэ лэжьыгъэхэр щащIыну Iэмал яIэщ, - жиIащ КъБР-м ЦIы­хубэ Iэп­щIэлъапщIагъэмрэ IэпэIэсагъэмкIэ и центрым и унафэщI Урыс Аслъэн. – Къапщтэмэ, иджыпсту унэтIыныгъэ 12-м худогъаджэ. Абыхэм ящыщщ лъэпкъ фэилъ­хьэгъуэхэмрэ вакъэхэмрэ дыныр, дыщэкI IэщIагъэр, хьэпшыпхэр пхъэм къыхэIущIыкIыныр, нэгъуэщIхэри. Ди лэжьыгъэр зыхуэунэтIар Налшык дэсхэм я зэманыр гъэщIэгъуэну икIи щхьэпэу ягъэкIуэнырщ. Гъэлъэгъуэныгъэм зыкърезыгъэхьэлIахэм IэпщIэлъапщIагъэм дихьэххэр фцIы­ху­мэ, ди центрым къефшэлIэну зыфхузо­гъазэ. Ди IэпэIэсэхэм я лэжьыгъэхэм сыт щыгъуи щIэупщIэ яIэщ. 
Жиздюк Маринэ и псалъэм къыхигъэщащ лъэпкъ щэнхабзэр, тхыдэ щIэинхэр, фэеплъхэр къагъэщIэрэщIэж, къызы­хэ­кIам, блэкIам цIыхухэм я гупэр хуагъэзэж зэрыхъуар, клубым хэт IэпщIэлъапщIэхэм я зэфIэкIхэм адэкIи хагъэхъуэну зэрамурадыр. «Сотворчество» Iуэхум хыхьэу гъэлъэгъуэныгъэм хэтахэм абы щIыхь тхылъхэмрэ сертификатхэмрэ яритащ. 
Къызэхуэсахэм ягу къагъэкIыжащ къэ­ралым ис нэхъыжьхэм ядэIэпыкъуным те­лэжьэну УФ-м и Президентым къызэригъэувар. Выставкэр зи жэрдэмым, ар къы­зэзыгъэпэщахэмрэ абы хэтахэмрэ фIыщIэ хуащIащ, я ехъулIэныгъэхэм зэрыригушхуэри дыщIагъужащ. 
ЗэIущIэр ягъэдэхащ икIи абы зыкърезыгъэхьэлIахэм я нэгу зрагъэужьащ уэрэ­д­жыIакIуэ-макъамэ Iэмэпсымэхэм еуэ «Пою­щие укулеле» гупым, республикэм и уэрэджыIакIуэхэм. 

Сурэтхэр Къарей Элинэ трихащ.