ЦIыху минхэм я IутIыжыгъуэт

Куэд щIат Налшык и «Спартак» республикэ стадионым апхуэ-диз цIыху къызэремыкIуалIэрэ - минихым нызэрыхьэсат. Ар икIи гурыIуэгъуэт: зэгуэрым премьер-лигэм ехъулIэныгъэхэр щиIэу хэта ди командэр иджыпсту урысей футболым и гупкIэм пысщ, дэрэжэгъуэ къыщыдатым нэхърэ дыщагъэбампIэр нэхъыбэу. Иджы цIыхухэр къызэхуэзышэсар Урысей Федерацэм и Кубо-кыр къэхьыным теухуауэ 2026-2027 гъэхэм екIуэкI зэхьэзэхуэм   и пэщIэдзэ зэIущIэм «Спартак-Налшыкым» къызэрыригъэблагъэрат блэкIа лIэщIыгъуэм и бгъущI гъэхэм Хьэпэ Заур я ­гъуащ­хьэтету къэралым и чемпион, иужькIэ вице-чемпион хъуа Владикавказ и «Алания»-р.

Армырами илъэс куэд хъуауэ, псом хуэмыдэу совет лъэхъэ-нэм, Къэбэрдей-Балъкъэрымрэ Осетие Ищхъэрэмрэ я футбол  командэ нэхъыщхьэхэм я зэпэ­щIэ­тыныгъэхэм сыт щыгъуи стадионхэм изу цIыхухэр къришалIэрт. Иджы абы къыхыхьэжат Урысей Футбол Зэгухьэныгъэм, зэи къэмыхъуауэ, зэпеуэм саугъэт нэхъыщхьэр - къэралым и кубокыр - Налшык къызэришар. Топджэгум дихьэххэм Iэмал ­гъуэзэджэ къахукъуэкIат ар я нэкIэ ялъагъуну, абы бгъэдэту сурэт зытрагъэхыну.
Къэбэрдей-Балъкъэрым и ­Iэ­тащхьэ КIуэкIуэ Казбек ди щIалэхэр тригъэгушхуэн му­радкIэ Правительствэм и Унэм щригъэблэгъащ зи унафэм щIэту «Спар­так-Налшыкыр» Уры­сейм  и премьер-лигэм хы­хьа икIи илъэс зыбжанэкIэ ехъу­лIэныгъэ­кIэ щыджэгуа Красножан Юрэ, Къэбэрдей-Балъкъэрым ФутболымкIэ и федерацэм и тхьэмадэ Мэшыкъуэ Аслъэн, «Спартак-Налшык» ФК-м и директор Заруцкий Александррэ абы иджыпсту и тренер нэхъыщхьэ Емкъуж Муратрэ. Тепсэлъыхьащ ди республикэм топджэгум щиIэ щытыкIэм, абы зэризиужьыну щIыкIэм. Дауи, къытеувыIащ Вла­дикавказ и «Алания»-м сы­хьэт зыбжанэ дэкIмэ драгъэ­кIуэкIыну зэIущIэм. КъБР-м и ­Iэтащхьэр къригъэблэгъахэм ехъуэхъуащ я насып текIуэну, ­лъахэм и щIыхьыр сыт щыгъуи яIэту къэгъуэгурыкIуэну.
«Спартак-Налшыкымрэ» «Ала­ния»-мрэ я зэIущIэм щIидзэным ипэ къихуэу топджэгум дихьэх­хэм я фестиваль стадионым ще­кIуэкIащ. Абы къызэщIиубыдащ зэпеуэ зэмылIэужьыгъуэ куэд икIи текIуахэм саугъэтхэр хуагуэшащ.
Псом хуэмыдэу топджэгум дихьэххэм дэрэжэгъуэ къаритащ нэхъапэм джэгупIэ губгъуэм иту е телевизоркIэ фIэкIа ямылъэ­гъуа футболист цIэ­рыIуэхэм ­еп­сэ­­лъэну, я гъусэу сурэт зыт­ра­гъэ­хыну, я IэщIэдз зытет хьэп­шыпхэр зыIэрагъэхьэну я на­сып ­къы­зэрикIам. Куэд дыдэ щы­зэт­рихьэрт Урысей Федерацэм цIы­хубзхэм я командэ къыхэхам и тренер нэхъыщхьэ ди лъахэгъу Красножан Юрэ, «Спартак-Налшыкым» хэту премьер-лигэм щы­­джэгуа Корчагин Эрик, 2008 гъэм екIуэкIа Европэм и чемпионатым домбеякъ мелдалыр къы­щы­зыхуагъэфэща, къэралым тIэунейрэ и чемпион Габулов ­Владимир, Урысейм и Кубокыр къэзыхьа Попов Денис сымэ я деж.

(КIэухыр. ПэщIэдзэр 1-нэ нап.)
«Спартак-Налшык» (Налшык) - «Алания» (Владикавказ) - 3:3 (0:3), пенальтикIэ - 4:2. Урысей Федерацэм и Кубок. «ЩIыналъэхэм я гъуэгуанэ», 2-нэ Iыхьэ. Налшык. «Спартак» республикэ стадион. ШыщхьэуIум и 13-м. ЦIыху 5836-рэ еплъащ. 
Судьяхэр Богданвичус (Москва), Гаджигусейнов (Мэхъэчкъалэ), Голов (Волгоград).
«Спартак-Налшык»: Каркаев, Пириев, КIэдыкIуей, Гирзишев, Гъуэгузокъуэ, ХьэцIыкIу (Iэпщацэ, 79), Хьэшыр, Малкандуев  (Пекъу, 82), Ибрагимов, (Селяев, 79), Лысенкэ (Тут, 67), Черкесов (ЛIуп, 67). 
«Алания»: Натабашвили, Кусков, Гиоев, Огоев, Каркузаев, Кобесов (Гурциев, 56), Тепсикоев (Закиров, 56), Белов (Козырев, 56), Рамонов (Касаев, 77), Абдулхамидов (Гагиев, 62), Амиралиев.
Топхэр дагъэкIащ: Рамоновым, 7 (0:1). Абдулхамидовым, 33 (0:2). Абдулхамидовым, 35 (0:3). КIэдыкIуейм, 87 (1:3). Селяевым, 90+3 (2:3). Гирзишевым, 90+5 (3:3).
26-нэ дакъикъэм Малкандуевым пенальти худэгъэкIакъым.
Пенальти зэреуар: Гурциевым - 0:0 (гъуэм хуигъэзакъым). Хьэ­шырым - 1:0. Козыревым - 1:1. КIэдыкIуейм - 2:1. Касаевым - 2:2. Гъуэгузокъуэм - 3:2. Огоевым - 3:2 (гъуащхьэм техуащ). ЛIупым - 4:2.
Дагъуэ къыхуащIащ: Амира­лиевым, Рамоновым, Iэпщацэм, Кусковым.
ЗэIущIэр игъэдэхэну кърагъэблэгъа «Блестящие» ансамбль цIэрыIуэм хэтхэм, Къэбэрдей-Балъ­къэрым и эстрадэм и артистхэм я макъ ­жьгъруми гур хигъахъуэрт. Дызэрыпагэ комментатор гъуэзэджэхэу ди лъэпкъэгъу Нэгъуч Роман, Генич Константин, Дурасов Павел, адрейхэри цIы­ху­хэм къаухъуреихьауэ ягъэуэршэрырт. Нэгъу­чымрэ Дурасовымрэщ «Матч ТВ»-м эфир зан­щIэкIэ къигъэлъэгъуа «Спартак-Налшык» - «Алания» зэпэщIэтыныгъэм узыIэпишэу, гъэщIэгъуэну, гукъыдэж къуиту мелуан зыбжанэ хъу телевизореплъхэм яхутепсэлъыхьар. 
Къэралым и хъыбарегъащIэ IэнатIэхэми ­гулъытэ ин хуащIащ мы зэIущIэм. Къапщтэмэ, «Спорт-Экспресс» газетым и япэ напэкIуэцIыр къызэрызэIуихар къуршхэр зи щIыбагъ къыдэт адыгэ фащэ зыщыгъ щIалэм и сурэтышхуэрщ, «Кубокым лъагапIэр къещтэ» зыфIаща тхыгъэр дэщIыгъуу. 
Къэбэрдей-Балъкъэрымрэ Осетие Ищхъэрэ-Аланиемрэ я футбол командэ нэхъыфIхэм я зэIущIэр зэрекIуэкIар ижь-ижьыж лъандэрэ ди лъэпкъ­хэм къадекIуэкI я зэхущытыкIэфIым къыпызыщэт. Хэгъэрейхэм гуапэу ирагъэблэгъа хьэщIэхэм стадионым щагуэшырт осетин дэлэнхэр, зэгъусэу сурэт зытрагъэхырт, зэхуэнэжэгужэт. АрщхьэкIэ, джэгум щIидза иужькIэ а псори лъэныкъуэкIэ екIуэтэкIащ. ЗэхэгъэкIын хуейт хэт нэхъ лъэщми, а зырат адэкIэ кIуэтэнур.
ХьэщIапIэ щыIэу зыкъэзымылъытэж «Ала­ния»-м и футболистхэр занщIэу Iуэхум иужь ихьащ. Ебланэ дакъикъэм Рамонов Заурбэч, я лъэныкъуэмкIэ топыр къыщыIэрыхьэу, ди ­гъуащхьэхъумитхури къыкIэрыщIауэ, бжыгъэр къыщызэIуихам, абы и дахагъым псори зригъэплъыжащ. 
Куэд дыдэ щIауэ я джэгукIэм къеплъыну апхуэдиз цIыху къызримыхьэлIа «Спартак-Налшы­кым» япэ удыныр игъэври, езыр къаруушхуэкIэ ебгъэ­рыкIуэу хуежьащ. Апхуэдэхэм ящыщ зым Хьэшыр Алан владикавказдэсхэм я гъуэм пэ­мыжыжьэу ираудащ. Пенальти! Ар зыгъэзащIэ хабзэр езы Алант е КIэдыкIуей Хьэкимт. АрщхьэкIэ метр пщыкIузым и деж бгъэдыхьар Мейкъуапэ къикIыжу къахыхьэжагъащIэ Малкандуев Алихъанщ. А щIалэщIэр зэуа топыр хуэм дыдэу гъуащхьэтетым IэщIыхьащ.
Апхуэдэ етIуанэ удынри гъэвыгъуейт. Арауэ къэплъытэ хъунущ къызыхэкIар 33-нэ, 35-нэ дакъикъэхэм 0:3-уэ ди командэр къыхагъащIэ зэрыхъуар. ЗанщIэу дигу къэкIыжащ 2019 гъэм «Ала­ния»-р 8:0-у къызэрыттекIуауэ щытар.
Загъэпсэхуну хухаха дакъикъэ зыбгъупщIыр «Спартак-Налшыкым» и тренер нэхъыщхьэ Емкъуж Мурат хурикъуащ зи унафэщI гупыр зэщIигъэуIуэжыну. Джэгум и етIуанэ Iыхьэм къихьар нэгъуэщI командэу фIэкIа пщIэнтэкъым.
Иджы ди щIалэхэр къаруушхуэ дыдэкIэ ебгъэрыкIуэрт икIи куэд къайхъулIэрт. АрщхьэкIэ топыр ерыщу хуейтэкъым гъуэм дэкIыну. Щымыхъужыххэм джэгупIэ губгъуэм кърагъэхьащ ЛIупыр, Тутыр, Селяевыр, Iэпщацэр, Пекъур. Абыхэм зыкъомкIэ я фIыгъэщ адэкIэ къэхъуар…
Джэгур и кIэм нэблэгъат. Абы хухаха зэман нэхъыщхьэр иухыным дакъикъэ зыщыплI иIэжу арат икIи 0:3-уэ зыдэщI командэм фIахьми имы­кIыжауэ зэхэс цIыху минихым нэблагъэмрэ телевизоркIэ абы еплъхэмрэ зыщIэхъуэпсыр «гъущэ» дыдэу къатемыкIуэн хуэдэу зы топ закъуэ нэхъ мыхъуми хьэщIэхэм зэрыхудагъэкIыжынрат. ­87-нэ дакъикъэм КIэдыкIуей Хьэким ар къыщехъулIам, хэт ищIэнт адэкIэ къэхъуну телъыджэр зыхуэдэр?!
Судья нэхъыщхьэм джэгум къыщIигъуащ дакъикъитху. Зы топ дэзыгъэкIыфа «Спартак-Налшыкыр» етIуанэми ерыщу хущIэкъуащ. Селяев Амырхъан ар къыщехъулIам, гугъэ ящIащ зэIущIэр кърагъэлыфыну. Абы папщIэ иджыри да­къикъищ щыIэт.
КъыпхуэIуэтэнкъым стадионым къыщыхъуар, джэгум къыщIагъуа етхуанэ дакъикъэр щиухым Гирзишев Тамерлан бжыгъэр зэхуэдэ щищIыжам. Псори къыщылъэтауэ зым адрейм IэплIэ хуищIырт, ехъуэхъурт! ТекIуэныгъэр я Iырылъхьэу да­къикъэ зытху къэзылъытэу щыта осетинхэм я щхьэр къыфIэхуат.
АдэкIэ насыпырыхьу ябж пенальти еуэным щIадзащ. Зи гукъэдэжыр уафэм нэса налшыкдэсхэм ямыщIэххэу къахукъуэкIа Iэмалыр дэ­гъуэу къагъэсэбэпащ. Метр пщыкIузым и деж щыту зэуа топиплIри абыхэм я хьэрхуэрэгъухэм худагъэкIащ, етхуанэри къахуэнауэ. «Алания»-м еуэгъуитIыр IэщIэкIащ. Арати, пенальти еуэнымкIэ «Спартак-Налшыкыр» 4:2-уэ текIуащ икIи адэкIэ Урысейм и Кубокым щIэбэнынущ.
Мис апхуэдэу удэзыхьэхыу, дэрэжэгъуэ къуиту Налшык и «Спартак» стадионым вэсэмахуэ зэIущIэ гъуэзэджэ щекIуэкIащ. Гуапэщ ар ди къэралым и цIыху мелуанхэми эфир занщIэкIэ зэралъэгъуар.