КъБР-м и Iэтащхьэ КIуэкIуэ Казбек ЩIыналъэм унафэр щызегъэкIуэнымкIэ центрым и унафэщI КIэдыкIуей Мадинэ ирита интервьюм къыщыхигъэщащ инфраструктурэм зегъэужьыныр республикэм и экономикэми псэукIэр ефIэкIуэнми я тегъэщIапIэ нэхъыщхьэу зэрыщытыр.
Республикэм щызэфIах лэжьыгъэхэр къызэщIиубыдэу, Iэтащхьэм тхьэмахуэ къэс ит интервьюр Налшык аэропортым щекIуэкIащ. ЗэIущIахэр тепсэлъыхьащ гъуэгухэр зыхуей зэрыхуагъазэм, цIыхубэм къигъэщхьэпэ транспортыр щIэкIэ зэрахъуэжым, ар хуэныкъуэ дэтхэнэ зыми тыншу игъуэту щытыным зэрыхущIэкъум.
Инфраструктурэм зегъэужьыным и мыхьэнэ нэхъыщхьэр псэукIэр зэрыригъэфIакIуэрщ, щIыналъэм и УнафэщIым зэрыжиIэмкIэ. Гъуэгухэр зэманым къигъэув мардэм тетмэ, республикэм щыпсэухэм ар тыншу къагъэщхьэпэ, абыхэм я фIыгъэкIэ проектыщIэхэм ухыхьэ мэхъу.
Щхьэхуэу я гугъу ящIащ къуажэхэмрэ щIыпIэ пхыдзахэмрэ хуащI гулъытэми. Инфраструктурэм зэрызиужьым мыхьэнэ иIэнукъым, ар республикэм щыпсэу дэтхэнэ зыми и Iуэху зэрыдигъэкI Iэмал мыхъунумэ.
Iэтащхьэр и интернет напэкIуэцIым цIыхухэм щадэгуэшащ КъБР-м транспортымрэ гъуэгу хозяйствэмкIэ и министр ДыщэкI Аслъэнрэ Налшык къалэ администрацэм и унафэщIым и къалэныр пIалъэ- кIэ зыгъэзащIэ Ащхъуэт Азэмэтджэрийрэ я гъусэу транспорт инфраструктурэм щелэжь IуэхущIапIэхэр къызэрызэхикIухьам, псалъэм папщIэ, ищхьэкIэ зи гугъу щытщIа интервьюр щекIуэкIа Налшык аэропортым щилъэгъуам арэзы къызэрищIам.
«КхъухьлъатэкIэ зекIуэн Iэмалым мыхьэнэшхуэ щиIыгъщ транспорт инфраструктурэм. Налшык аэропортым щекIуэкI лэжьыгъэм и фIыгъэкIэ, къэралым и щIыпIэ жыжьэхэм къикIыу, Къэбэрдей-Балъкъэрым къэзыунэтI туристхэмрэ хьэщIэхэмрэ ди зыгъэпсэхупIэхэм тыншу къокIуэф. КъинэмыщIауэ, щIалэгъуалэр еджакIуэ кIуэнми, хьэрычэтыщIэхэм сату Iуэху зэрахуэнми, унагъуэхэм я нэгу зрагъэужьыну ежьэми - псоми къагъэщхьэпэ аэропортыр, - етх КIуэкIуэ Казбек. - Налшык кхъухьлъатэ тедзапIэм щызэблэкI цIыху бжыгъэр иужьрей илъэс ныкъуэм мини 104,5-м нэсащ, ар илъэс блэкIам зэрыщытам еплъытмэ, процент 33-кIэ нэхъыбэщ. А псор къезыгъэхъулIар кхъухьлъатэхэр здэкIуэ щIыпIэхэм я бжыгъэм зэрызиубгъуарщ. Псалъэм и хьэтыркIэ, Мэзкуу нэхъыбэрэ мэлъатэ, Сочэ, Санкт-Петербург, Къэзан пIалъэ пыухыкIам тету лъатэ рейсхэр щыIэщ, къэралщIыбым кIуэхэм ящыщу, Сауд Хьэрыпым лъэIэс кхъухьлъатэ гъуэгу пхашащ. КъыкIэлъыкIуэ илъэсым Екатеринбург зыпащIэну я мурадщ.
(КIэухыр. ПэщIэдзэр 1-нэ нап.)
Уи гуапэ мыхъуу къанэркъым Налшык аэропортыр гъуэгу теувэ цIыхухэм Iуэхур щагъэпсынщIэным зэрелIалIэр. Кхъухьлъатэ тедзапIэми, техникэми, шынагъуэншагъэр къызэрызэрагъэпэщ Iэмалхэми зихъуэжащ, зехьэн хуей ухуэныгъэхэр зэIузэпэщ ящIри, аэропортыр зыхуей хуагъэзащ».
КIуэкIуэ Казбек аэропортым и лэжьакIуэхэм яхуэзэри, гупым ехъулIэныгъэкIэ я IэнатIэр ирахьэкIыну ехъуэхъуащ.
Къалэм щекIуэкI гъуэгу лэжьыгъэхэм щыгъуазэ зыщищIым, КIуэкIуэ Казбек зригъэлъэгъуахэм язщ Байсултановым и цIэр зезыхьэ уэрамри. Мыбдежым щекIуэкI лэжьыгъэхэр и кIэм нэблэгъауэ, иджы уэрамым и Iуфэхэр ягъэкъабзэ. Гулъытэ щхьэхуэ хуащI абдежым ит щхъуантIагъэхэр къызэтрагъэнэным. А мурадым лъэIэсын папщIэ, жыгхэм яубыд гъуэгу Iыхьэм деж щIы тракIутэ, щIэуэ къэкIыгъэхэр хасэным хуагъэхьэзыр.
Налшык щызэрагъэпэщыж гъуэгухэм я кIыхьагъыр псори зэхэту километр 50-м щхьэдэхынущ. Абы хиубыдэр гъуэгушхуэхэм я закъуэкъым, щIыпIэ нэхъ пхыдзахэри зэрытыпхъэ мардэм хуагъакIуэ.
КIуэкIуэ Казбек гулъытэ щхьэхуэ хуищIащ «Налшык транспорт» IуэхущIапIэр зыхуей хуэгъэзэн зэрыхуейми, псом хуэмыдэу, абы щылажьэ транспортыр щIэкIэ хъуэжыныр къалэн нэхъыщхьэхэм язщ.
«Мы махуэхэм тIысыпIэ 23-рэ зиIэ, псори зэхэту цIыху 65-рэ зэрыхуэ ПАЗ Vektor Next автобусыщIэу 16 къытIэрыхьащ, - щитхыжащ и напэкIуэцIым КIуэкIуэ Казбек. – Видео хэту, хьэуар зыгъэщIыIэтыIэ IэмэпсымэкIэ, ГЛОНАСС спутник зегъэкIуэкIэ IэмалкIэ къызэгъэпэщауэ апхуэдэщ ахэр. Уасэр ептын папщIэ, ахъшэ Iэрылъхьэ къыумыгъэщхьэпэми хъунущ, зи IэпкълъэпкъкIэ сэкъат зиIэ пассажирхэм яхухэха тIысыпIэхэри щхьэхуэщ. Дэфтэрхэр зыхуей хуэзэмэ, автобусыщIэхэр республикэм и гъуэгухэм техьэнущ.
Къыхэзгъэщыну сыхуейщ гъуэгу-транспорт хозяйствэм щедгъэкIуэкI лэжьыгъэ псори ди Президент Путин Владимир къыхилъхьа «ГъащIэм хуэщIа инфраструктурэ» лъэпкъ проектым фIыуэ кърикIуахэм зэращыщыр.
2024 гъэм щегъэжьауэ, республикэм автобусыщIэ 44-рэ къыIэрыхьащ. Иджыри 15-м дыпоплъэ. Илъэсищым къриубыдэу, зэманым лъэщIыхьэ машинэ 75-рэ диIэнущ.
Иджыпсту къалэм зыщуплъыхьмэ, автобусхэм зэрыпэплъэ зэманыр нэхъ кIэщI зэрыхъуам гу лъыботэ. Районхэм къикIыу Налшык лэжьакIуэ къакIуэхэри нэхъ тыншу зекIуэу хъуащ. ДяпэкIи Къэбэрдей-Балъкъэрым транспорткIэ къыщыпкIухьыныр нэхъри тынш зэрытщIыным хуэгъэза лэжьыгъэхэм яужь дитынущ».
