Анэдэлъхубзэмрэ щэнхабзэмрэ гулъытэ хуащI

2026 - 2027 гъэ еджэгъуэщIэм ипэ къихуэу КъБР-м и Iэтащхьэ КIуэкIуэ Казбек еп­сэ­лъылIащ ЩIыналъэм Iуэхухэр щызегъэ­кIуэнымкIэ и центрым (ЦУР) и унафэщI ­КIэ­дыкIуей Мадинэ. Псалъэмакъыр теухуауэ ­щытащ щIыналъэм и егъэджэныгъэ Iэна­тIэм адэкIи зэрызиужьыну щIыкIэхэм, абы и ­фIагъыр нэхъри къэIэтыным хуэгъэпса Iуэхугъуэхэм, егъэджэныгъэм хуэщIа лъэпкъ пэхуэщIэхэмрэ программэхэмрэ гъэзэ­щIэ­ным. 

КIуэкIуэ Казбек МАХ-м щиIэ напэкIуэцIым зэрыщитхымкIэ, къулыкъущIэхэм гулъытэ хэха зыхуащIахэм ящыщщ Къэбэрдей-Балъкъэрым щыпсэу лъэпкъхэм я анэдэлъхубзэмрэ щэн­хабзэмрэ хъумэным, анэдэлъхубзэхэр курыт школым тэрэзу щыджыным епхахэр. Апхуэдэу КIуэкIуэ Казбекрэ КIэдыкIуей Мадинэрэ теп­сэлъыхьащ курыт еджапIэхэр IэщIагъэлIкIэ ­ири­къуу къызэгъэпэща зэрыхъунум, ныбжьы­щIэ ­зэчиифIэхэмрэ абыхэм я унэтIакIуэхэмрэ адэкIи тегъэгушхуэным, олимпиадэ зэщIэ­хъееныгъэм нэхъри зэрызегъэужьыпхъэм, егъэджа­кIуэхэм я улахуэр къэIэтыным гулъытэ зэрыхуа­щIынум. КъинэмыщIауэ, зэIущIэм ­къыщаIэтащ зи узыншагъэм сэкъат иIэ ныбжьыщIэхэм щIэ­ныгъэ ягъуэтыфынымкIэ Iэ­малхэр къахузэгъэ­пэщын зэрыхуейм. 
Жылагъуэм мыхьэнэшхуэ щызиIэ IэнатIэр къэрал гулъытэ лъагэ зыгъуэт унэтIыныгъэхэм зэ­рыхалъытэр къыхагъэщащ псалъэмакъым.