ЦIыху губзыгъэу, хахуэу тхыдэм къыхэна

24 августа, 2026 - 13:07
Урысейм и ЛIыхъужь, Шэшэн Республикэм и Президенту щыта Кадыров Ахъмэт-Хьэжы къызэралъхурэ илъэс 75-рэ ирикъуащ. КъБР-м и Iэтащхьэ КIуэкIуэ Казбек Максым щиIэ напэкIуэцIым а махуэм иритхащ:
«ЩIыналъэм дежкIэ мыхьэнэшхуэ зиIэ зэманым республикэм и унафэщI къулыкъум теувауэ щытащ ар.
Си адэ, КIуэкIуэ Валерий Мухьэмэд и къуэмрэ абырэ гуапэу зэхущыту, зэкъуэшыгъэ яку дэлъу къызэдэгъуэгурыкIуащ.
ДэркIи, ар зыцIыхуу щыта адрейхэми я дежкIэ, ар цIыху губзыгъэу, хахуэу тхыдэм къыхэнащ, ар и лъэпкъым зэрыхуэпэжар дэтхэнэ зымкIи щапхъэ нэсу щытынущ сыт щыгъуи.
КъызэрымыкIуэу хьэлъэу щыта а зэманым абы и щыпкъагъэр къигъэлъэгъуэфащ, республикэм зэран къыхуэхъу, къэралыр зэкъуэзыудыну хущIэкъу къарухэм япэщIэтыфащ, жэуаплыныгъэшхуэ зыпылъ къалэн и пщэм къыдэхуэри, щалъхуа республикэм мамыр псэукIэр щызэтригъэувэжащ.
Ахъмэт-Хьэжы Абдулхьэмид и къуэм и лъэпкъэгъухэр зэкъуигъэувэфащ, и республикэр зыужьыныгъэм и гъуэгум тришэжыфащ – абы цIыхухэм я дзыхь кърагъэзащ!
Ноби си къуэш лъапIэ Кадыров Рамзан Ахъмэт и къуэми апхуэдэ дыдэу Хэкум къулыкъу хуещIэ, илъэс куэд хъуауэ ехъулIэныгъэхэр иIэу Шэшэн Республикэм и унафэщIщ.
 ЩIыналъэм социально-экономикэ зыужьыныгъэм и унэтIыныгъэ куэдымкIэ зэфIэкIыфIхэр къегъэлъагъуэ. Ди къуэш шэшэн лъэпкъым щыщхэр я унафэщIым къуэувауэ, хьэлэлу толажьэ я щIыналъэр нэхъри егъэфIэкIуэным.
Нобэ Шэшэн Республикэм пщIэ щиIэщ лъэпкъ куэду зэхэт ди къэралыгъуэшхуэм. Абы и цIыхухэм я гъащIэр къыгуэхыпIэ имыIэу пыщIащ Урысей хэкум исхэм ейм.
Шэч къытесхьэркъым – абы папщIэщ и къару емыблэжу щIэпсэуар икIи щIэлэжьар Кадыров Ахъмэт-Хьэжы. КъэкIуэну щIэблэхэр мамыру, шынагъуэншэу псэун папщIэ ар и гъащIэ еблэжакъым.
Шэч хэмылъу, ар ирипэгэнт Шэшэн Республикэр ди зэманым зэрыхъуам.
ЦIыху щыпкъэм, политик Iэзэм и фэеплъыр тщыгъупщэнкъым.
Ди къуэш Шэшэн Республикэм исхэм я уафэр мамыру щытыну, я Iуэхухэр сыткIи ефIакIуэу, зэкъуэту псэуну си гуапэщ». 
  • 13 просмотров
Поделиться: