Террорым пыщIа щIэпхъаджагъэхэр

«Урысей МВД-м, Урысей ФСБ-м я лэжьакIуэхэм яубыдащ терактхэм, апхуэдэуи дунейпсо террорист зэгухьэныгъэм и лэжьыгъэм пыщIауэ шэч зыхуащIхэр. 

Къапщтэмэ, Адыгей Рес­пуб­ликэм и щыхьэр Мей­къуа­пэ къыщызэпаудащ щIыпIэм щы­п­сэум илэжь хабзэншагъэр. ЗэраубзыхуамкIэ, абы и гуращэт Урысейм ЗыхъумэжыныгъэмкIэ и министерствэм къепха хэщIапIэм террор Iуэху щилэжьыну, зыхуэтхэ украин кураторым къызэрыхуигъэувам тету. 
Яубыдам къытрахащ те­рактым зыхуэгъэхьэзырыным ехьэ­лIа хьэпшыпхэмрэ тхыгъэхэмрэ. Абы теухуа уголовнэ Iуэху къаIэтащ УФ-м и УК-м и 30-нэ, 205-нэ статьяхэм япкъ иткIэ. 
Дунейпсо террорист зэгу­хьэныгъэм и щIыпIэ къудамэм хэту шэч зыхуащIу II оперативникхэм щаубыдащ КъБР-м и Дзэлыкъуэ районым. Абыхэм радикальнэ унэтIыныгъэм къы­хураджэрт икIи я Iуэху еплъыкIэр къадэзымыIыгъхэм ятеуэрт. 
Следствием къызэрилъытэмкIэ, гупым апхуэдэ хабзэншагъэ­хэр зэрахьэрт мы гъэм и мэ­лыжьыхьым щыщIэдзауэ. Абы и лэжьыгъэр къызэпаудащ ­КъБР-м щыIэ МВД-м и ЦПЭ-м, Урысей ФСБ-м и республикэ управленэм, Урысей МВД-м и управленэ нэхъыщхьэу КИФЩI-м щыIэм я лэжьакIуэхэм, Урысей гвардиер я щIэгъэкъуэну.  
КъБР-м щыIэ МВД-м и Следственнэ управленэм зэхегъэкI УФ-м и УК-м и 205.2 статьям къыщыхьа щIэпхъаджагъэр зэралэжьам ехьэлIа уголовнэ Iуэхур. Ар зытеухуахэр яубыдащи, я нэIэ тетщ», - къет Урысей МВД-м и лэжьакIуэ Волк Иринэ.
Урысей МВД-м фыщегъэгъуазэ: Украинэм и щэхурылажьэ IэнатIэ хэхахэмрэ нэгъуэщI къэ­ралхэм щыщхэмрэ ди хэкум къыщалъыхъуэ хабзэншагъэ­хэр, абы диверсие-террор жы­хуи­Iэхэри хыхьэу, лэжьыным хуэхьэзырхэр. Фигу къыдогъэкIыж терактхэмрэ къэралым и дзэ, промышленнэ IуэхущIапIэхэм зэран яхуэхъухэр лэжьыныр щIэпхъаджагъэ хьэлъэ дыдэхэм зэращыщыр. Урысей Федерацэм и Уголовнэ кодексым и статьяхэм къагъэув абы пыщIахэр пIалъэ кIыхькIэ ягъэтIысыныр.