ЦIыху зэхуэсыпIэхэр зыхуей хуагъазэ

Ди гъащIэр ефIэкIуэнуми екIэкIуэнуми зэлъыта Iуэхугъуэ­хэм ящыщщ жылагъуэ щIы­пIэхэм, пщIантIэхэм, утыкухэм я зэпэщыныгъэр. А унэтIыныгъэхэм ехьэлIа псалъэмакъ щхьэ­пэ мы махуэхэм зэдрагъэкIуэкIащ КъБР-м и Iэтащхьэ КIуэкIуэ Казбекрэ ЩIыналъэм Iуэхухэр щызегъэкIуэнымкIэ и центрым (ЦУР) и унафэщI КIэдыкIуей Мадинэрэ.

КъулыкъущIэхэр тепсэ­лъы­хьащ­ цIыху зэхуэсыпIэхэр, унэ зэ­хэт­хэм я пщIантIэхэр зыхуей хуэгъэзэным, республикэм и жы­лэхэм щхъуантIагъэ щыгъэ­тIысыным. 
Ди республикэм и Iэтащхьэм зэрыжиIамкIэ, 2018 гъэ лъандэрэ Къэбэрдей-Балъкъэрым зэпэщ щащIыжащ IэнатIэ 1000-м нэс. Дызэрыт илъэсым къриубыдэу лэжьыгъэфIхэр щызэфIахащ жы­лагъуэ зэхуэсыпIэу, цIыху кIуа­пIэу щыт щIыпIэ 41-м, Къалэ псэукIэр егъэфIэкIуэнымкIэ Х урысейпсо зэпеуэм щытекIуэу мылъку къызыхуаутIыпщахэри яхэту. КIуэкIуэм къыхигъэщащ цIыху зэхуэсыпIэхэр зыхуей хуэгъэзэным епха лэжьыгъэхэр зэдэууэ гъэзэщIэн зэрыхуейр, жы­лэдэсхэм я еплъыкIэхэр Iуэ­хум къыхэлъытарэ иджырей технологиехэр къэгъэсэбэпауэ. 
Гулъытэ хэха зыхуэщIыпхъэ Iуэхугъуэхэм ящыщу къалъытащ, цIыху зэхуэсыпIэхэмрэ къалэ пщIантIэхэмрэ зыхуей хуэгъэзэным къыдэкIуэу, ди щIыналъэм и жылэхэм жыгыщIэхэр щыхэсэныр, теплъэр зыгъэда-­      хэ нэгъуэщI щхъуантIагъэхэр ­щы­гъэтIысыныр. Ди республикэм и щIыуэпсыр, зыми емыщхьу абы бгъэдэлъ щхьэхуэныгъэхэр ­хъумэнми зэрыхуэсакъынури къыщыхагъэщащ зэIущIэм.