ЩIэныгъэм, Iэзагъэм хагъахъуэ

Медицинэм и унэтIыныгъэ щхьэхуэхэм теухуа щIэныгъэ зэхыхьэхэр щIэх-щIэхыурэ республикэм къыщызэрагъэпэщ. Апхуэдэ зи чэзу зэхыхьэр щекIуэкIащ КъБКъУ-м и медицинэ академием - лышх узыфэм, ар зыпкърыт сымаджэхэм ягъуэтын хуей дэIэпыкъуныгъэм теухуа япэ щIыналъэзэхуаку щIэныгъэ-практикэ конференцэр. Абы хэтащ Кавказ Ищхъэрэм хыхьэ щIыналъэхэм, Санкт-Петербург, Тбилиси къикIа онкологхэр, радиологхэр, реабилитологхэр, щIэныгъэлIхэр.

КъБКъУ-м щIэныгъэ-къэхутэныгъэ лэжьыгъэхэмкIэ и проректор, ЩIэныгъэхэмкIэ урысей академием хэт Хьэшыр Светланэ зэIущIэр къыщызэIуихым къыхигъэщащ лышх узыфэр зыпкърыт сымаджэхэм еӏэзэным, абыхэм я узыншагъэр зэфӏэгъэувэжыным бгъэдыхьэкIэ щхьэхуэ иIэн папщӏэ, медицинэм и IэщIагъэлI зэхуэмыдэхэр зыхэт зэӏущӏэм мыхьэнэшхуэ зэриӏэр.

«Терапевтхэр, хирургхэр, реабилитологхэр зэгъусэу унэтIыныгъэм щыIэ гугъуехьхэм зэрытепсэлъыхьым хэкIыпIэщIэхэр къигъэнэIуэнущ. Апхуэдэ бгъэдыхьэкӏэр лъэпкъ проектхэм къагъэув къалэнхэми поджэж. Нэхъыщхьэр сымаджэм и узыншагъэр зэтеувэжыху игъуэт дэIэпыкъуныгъэрщ: абы еIэзэным деж щегъэжьауэ гукъыдэж иIэу жылагъуэм хэзэгъэжыным нэсыху гулъытэ хуэщIынырщ. Шэч къытесхьэркъым, зэфӏэкӏ пэрытхэмкӏэ зэхъуэжэныр узым текӏуэнымкIэ хэлъхьэныгъэфӏ зэрыхъунум», - жиIащ Хьэшыр Светланэ.

КъБР-м узыншагъэр хъумэнымкIэ и министр Къалэбатэ Рустам хьэщIэхэм зэрызахуигъазэм къеджащ абы и къуэдзэ Хьэщхъуэжь Борис.

«Онкологие IэнатIэм нобэ щызэфIагъэкIыр узыр къэхутэнымрэ ар зыпкърытым еIэзэнымрэ и закъуэкъым, атIэ сымаджэм къыпэщылъ Iуэху псори зэфIэкIыху дэщIыгъущ. Апхуэдэ бгъэдыхьэкӏэм щытыкIэр нэхъ тынш къащещI. ЩIыналъэм IэнатIэм и инфраструктурэм зыщыдогъэужь, иджырей мардэхэр лэжьыгъэм къыхыдогъэхьэ. Ауэ медицинэм гъунапкъэ иIэкъым, абы къыхэкIыуи зэфIэкIхэмкIэ зэхъуэжэныр Iуэхур ипэкIэ зыгъэкIуатэ Iэмал хъарзынэщ. Шэч къытесхьэркъым конференцым къыщаIэтахэм япкъ иткIэ къащта унафэхэр къэралым онкологие дэIэпыкъуныгъэм зыщиужьынымкIэ хэлъхьэныгъэфI зэрыхъунум», - щыжеIэ министрым и зэрызыхуигъазэм.

КъБР-м Узыншагъэр хъумэнымкIэ и министерствэм штатым хэмыт и IэщIагъэлI-онколог АфIэунэ Мухьэмэд тепсэлъыхьащ Къэбэрдей-Балъкъэрым и онкологие IэнатIэм щыщыIэ щытыкIэм. Абы къыхигъэщащ республикэм Лышх узыфэхэр зыпкърытхэм щеIэзэ и диспансерым инфраструктурэ лъэщ зэриӏэр, блэкIа илъэсым фIагъ зиIэ дэIэпыкъуныгъэ зыгъуэтахэм я бжыгъэм зэрыхэхъуар, иджырей диагностикэ Iэмэпсымэхэм я фIыгъэкIэ иджы узыфэхэр нэхъ псынщIэу и чэзум къазэрыхуэхутэр. Апхуэдэу АфIэунэм жиIащ республикэм мыгувэу Лышх узыфэр зыпкърытхэм щеIэзэ сымаджэщым и унэщIэ къызэрыщызэIуахынур.

АдэкIэ конференцым и лэжьыгъэр ирагъэкIуэкIащ «стIол хъурей» жыпхъэм иту. Зэхыхьэм хэтхэр тепсэлъыхьащ сабий онкологием, узыр и чэзум къэхутэнымкIэ, абы зэрызиубгъум упэщIэтынымкIэ щыIэ IэмалыщIэхэм.

Ӏэщӏагъэлӏхэм и гугъу ящIащ ПЭТ-КТ-мрэ ОФЭКТ-КТ-мрэ къызэрагъэсэбэп щIыкIэхэм, МРТ, УЗИ къэхутэныгъэхэм, дерматоскопием и бгъэдыхьэкӏэщӏэхэм хэлъ щхьэхуэныгъэхэри зэпкърахащ. Къыхагъэщащ сымаджэхэм я узыншагъэр зэфӏагъэувэжын папщӏэ Налшык курортым и щӏыуэпс хущхъуэхэр къызэрагъэсэбэпыфынум. Апхуэдэуи сымаджэщхэмрэ реабилитацэ центрхэмрэ я зэдэлэжьэныгъэм зэрызрагъэубгъунури яубзыхуащ.

IэщIагъэлIхэм я мурадщ зэхыхьэм къыхаха чэнджэщхэмрэ лэжьыгъэ и пIалъэ къащIахэмрэ Кавказ Ищхъэрэм медицинэ дэIэпыкъуныгъэр щегъэфIэкIуэным хуэунэтIауэ я IэнатIэхэм къыщагъэсэбэпыну. Конференцэм хэтахэм сертификатхэр иратащ.