ШколакIуэхэм зыщIагъакъуэ

Къэбэрдей-Балъкъэрым щыпащэ «ЕджэнымкIэ дэIэпыкъу» Урысейпсо акцэм.

Ар хуэунэтIащ щытыкIэ гугъум къихута унагъуэхэм ядэIэпыкъуным, школакIуэхэр Iэмал имыIэу зыхуеину хьэпшыпхэмкIэ къызэгъэпэщыным.

Iуэху щхьэпэм хэтщ полицэм и лэжьакIуэхэр, къэрал кIуэцI IуэхухэмкIэ район IэнатIэхэм ядэлажьэ Жылагъуэ советхэм ящыщхэр, опекэмрэ попечительствэмкIэ къудамэхэм я лэжьакIуэхэр, апхуэдэуи волонтер жыджэрхэр.  

Апхуэдэ Iуэхухэр щекIуэкIащ Налшык, Бахъсэн, Прохладнэ районхэм.

Акцэм хэтхэр щыIащ дэIэпыкъуныгъэ хуэныкъуэ унагъуэхэм. Сабийхэм IэщIалъхьащ къагъэсэбэпыну хьэпшыпхэр: тетрадхэр, альбомхэр, ручкэхэр, къэрэндащхэр, нэгъуэщIу еджэныгъэм папщIэ зыхуеинухэр.

КъинэмыщIауэ, ПДН-м и инспекторхэм псалъэмакъ щхьэпэ драгъэкIуэкIащ адэ-анэхэм. Гулъытэ хэха хуащIащ я къалэн ягъэзэщIэным, сабийхэр гъэсэнымрэ егъэджэнымрэ, апхуэдэуи еджэныгъэр щекIуэкIкIэ шынагъуэншагъэм тетын зэрыхуейм.

- Ди къалэныр – ныбжьыщ1эхэр школ кIуэжыгъуэм  хуэгъэхьэзырынымкIэ зыщIэдгъэкъуэным и закъуэкъым, атIэ ахэр еджэным тедгъэгушхуэнырщ. ЗэхущытыкIэ тэмэм зэрымылъ унагъуэхэм щыщ сабийхэм ядэIэпыкъуныр  абыхэм я къэкIуэнум хуэтщI хэлъхьэныгъэу  къыдолъытэ, - къыхагъэщащ къызэгъэпэщакIуэхэм.  

Адэ-анэхэм полицэм и лэжьакIуэхэмрэ жылагъуэ Iуэхум хэтхэмрэ фIыщIэ хуащIащ я гулъытэмрэ къазэрыдэIэпыкъуамрэ папщIэ.