ЦIыхубэм фIыкIэ ягу къинэжа

Бэрбэч ХьэтIутIэ си къуажэгъуу икIи си ныбжьэгъуфIу щытащ. Ди Аушыджэр жылэжьым дэт курыт школым дыщызэдеджащ. ИужькIэ, 30 гъэхэм я пэщIэдзэхэм, ди гъуэ­гуанэхэр зэхэкIащ икIи куэдрэ дызэримыхьэлIэу екIуэкIащ. ХьэтIутIэ Налшык дэт педтехникумым щIэтIысхьащ. Зэман дэкIри, сэри а еджапIэм сы­кIуащ, ауэ абы щыгъуэ Бэрбэчыр Ленинград щеджэкIэт.

Дэ тIур дыщызэхуэзэжар Хэку зауэшхуэм и зэманырщ. ХьэтIутIэ ­партым и Налшык къалэ комитетым и секретару лажьэрт, сэ Совет район комитетым и къудамэм сриунафэщIт. Лэжьыгъэ IуэхукIэ щIэх-щIэхыурэ дызэрихьэлIэрти, ХьэтIутIэ си гъащIэр зэрекIуэкIым щIэупщIэрт, зауэм къызэсха уIэгъэ хьэлъэм тегузэвыхьырт. А илъэсхэм сэ куэдрэ сыщыхьэщIащ абыхэ я унэ Къэбэрдей уэрамым тетам. Дэ дыуэршэру ды­зэбгъэдэст, и дзыхь къызигъэзырт, республикэм щекIуэкI, мыхьэнэшхуэ зиIэ Iуэхухэм щыгъуазэ сищIырт.
Налшык сыкъагъакIуэу республикэм и радио комитетым и тхьэмадэу сагъэува нэужь, дэ нэхъыбэрэ дызэхуэзэ ­хъуат. Идеологием теухуауэ республикэм щекIуэкI Iуэхугъуэхэм сыхэткIэрэ, сэ си нэгу щIэкIащ си къуажэгъум, ныбжьэгъум и парт лэжьыгъэр зэрызэфIэувар, коммунистхэм я деж ХьэтIутIэ и пщIэр зэрыщылъагэр.
Абы бгъэдэлъ щэнхабзэмрэ щIэныгъэ куумрэ зыхэт гупым куэдкIэ къыхагъэфIыкIырт. ХьэтIутIэ сыт хуэдэ лэ­жьыгъэри къызыхуэтыншэу зэфIигъэ­кIыфырт. Езым и фейдэ зыхэлъ гуэр абы къыхигъэкIыну игу къэмыкIыххэу, Iуэхум гурэ псэкIэ бгъэдыхьэрт, пэжым, захуагъэм дапщэщи я телъхьэт.
Бэрбэч ХьэтIутIэ хыхьэхэкI зиIэ, дэтхэнэ зыми зэрепсэлъэну бзэ къыхуэзыгъуэтыф, студент щIалэгъуалэр фIыуэ зылъагъу, абыхэм пщIэ яхуэзыщI цIыху гъуэзэджэт. Лекцэ нэужьым къыхуихуэ зыгъэпсэхугъуэ дакъикъэхэм ар студентхэм къаухъуреихьауэ яхэту куэдрэ плъагъурт. Апхуэдэхэм деж ар тепсэлъыхьыжырт къызэджа лекцэхэм е и гъащIэм зыщрихьэлIа Iуэху­­гъуэ нэхъ гъэщIэгъуэнхэм ящыщ студентхэм яжриIэжырт. Студентхэми егъэджакIуэхэми Бэрбэчыр фIы дыдэу къалъагъурт. Абы и щыхьэтщ ХьэтIутIэ дунейм ехыжа нэужь илъэс куэдкIэ университетым и студент общежитым абы сурэт куэд дэнэкIи ущрихьэлIэу зэрыщытар.
Хэлъ цIыхугъэ инырт, зыхэпсэукI зэманым декIуу зэрыщытырт, дуней еплъыкIэ къулей зэриIэрт, дауи, ХьэтIутIэ куэдым я гум щIынэсыр. Бэрбэчыр зыцIыхуа, абы хуэзэну, епсэлъылIэну зи насып къикIа дэтхэнэми ар фIыкIэ и гум къинащ, шэч хэмылъу.

КъБКъУ-м и тхыдэ-филологие факультетым и декану щыта, Хэку зауэшхуэмрэ лэжьыгъэмрэ я ветеран. 1998 гъэ