Мывэ къудейкъым

10 августа, 2021 - 07:10
ЩIэныгъэлIхэм зэрыжаIэмкIэ, ЩIы Хъуреймрэ абы уахэм къыщыдэгъуэгурыкIуэ Мазэмрэ я ныбжькIэ зэрызэщхьэщыкI щыIэкъым. Апхуэдэу, ди планетэр къызэрыунэхурэ сыхьэт 24-рэ фIэкIа дэмыкIауэ къызыщыдгъэхъумэ, хьэршым къыщыддэщIыгъу уафэщIыр къыкIэлъыкIуа дакъикъипщIым иужькIэщ къыщыунэхуар – аращ а тIум къагъэщIам зэхуакуу яIэри. 
 
КъызэрыхагъэщымкIи, Мазэр ди планетэм ауэ сытми къыдэгъуэгурыкIуэ мывэ скъар абрагъуэу аракъым. Еджагъэшхуэхэм къызэрахутамкIэ, ар димыгъусатэмэ, дыщыпсэу ЩIым мы зэманым иIэнур нэгъуэщI теплъэт, уеблэмэ, гъащIэ къыщымыунэхуххэнкIэри хэлът.
АтIэми, физикэ щIэныгъэм къызэригъэувымкIэ, хьэршым ит вагъуэ нэхъ ин дыдэхэм я деж къыщыщIэдзауэ (ди Дыгъэри яхэту), планетэхэмрэ абыхэм къедза спутникхэмрэ, метеоритхэмрэ мывэ тыкъырхэмрэ, я нэхъ жьгъеижхэм я деж щиухыжу, гравитационнэ губгъуэм къыпкърыкI малъхъэдис къарум зым адрейр къыпыщIа фIэкIа умыщIэну, зрешалIэ. 
Мазэр къызэрыддэгъуэгурыкIуэм къытхуишэ сэбэпынагъ нэхъ инхэм ящыщщ ди планетэм и кIуэцIым ит магмэр, зэпцIыжарэ и пIэ ижыхьыжауэ щимыгъэту, зэпымыууэ зэрызэригъакIуэри (и зы Iыхьэр нэхъ пэгъунэгъурэ адрейр зэрыпэIэщIэм къыхэкIыу), зэпымыууэ къызэрызэщIигъаплъэри, ар и щхьэусыгъуэу, иджыри къыздэсым хуабэрэ ткIуаткIуэу къызэрызэтригъэнари. ЩIэныгъэлIхэм къызэралъытэмкIэ, арагъэнущ ЩIы Хъурейм къыщыунэхуа гъащIэм лъабжьэ быдэ щищIынымкIи нэхъри зыщиужьынымкIи шэсыпIэ нэхъыщхьэу къэувар.
АдэкIэ дыкIуэтэнщи, Мазэр уэгум имытыххамэ, ди планетэм жэщхэр куэдкIэ нэхъ кIыфIу икIи пхъыплъыгъуейуэ щыщытынут, иджыпсту къызэрыщекIуэкIым хуэмыдэу. Биологхэм зэрыжаIэмкIэ, апхуэдэу хъуатэмэ, ЩIы Хъурейм тет псэущхьэ псоми (дэри дахэту) ди нэхэм, вындым хуэдэу зэщIэуфIыцIа жэщым зыгуэрхэр щыхэтлъагъукIыфын хуэдэу, хуабжьу заужьынут. Хэт ищIэрэ, еджагъэшхуэхэм псалъэм къыдэкIуэу къызэрыхагъэщщи, абы щыгъуэ электроуэздыгъэхэр къамыгупсысыхэнкIэри хэлът.
АтIэми, телъыджэр аращи, ЩIы Хъурейм къыщхьэщыт къэщIыгъэ абрагъуэм дунейпсо хым и псыр и пIэм къызэрыришым, зэрызэригъакIуэм къыхэкIыу, езы планетэм и зыгъэджэрэзыкIэм (полюситIым пхыукъуэдиикIа и джэлэсым и къекIэрэхъуэкIыкIэм) тIэкIу-тIэкIуурэ кIэрегъэху (илъэсищэм къриубыдэу зы микросекунд хуэдизкIэ). Абы къикIыр аращи, Мазэр ди планетэм къыдэщIымыгъуатэмэ, жэщ-махуэм сыхьэти 8 фIэкIа и кIыхьагъынутэкъым, илъэсыр махуэ 1000-кIэ екIуэкIынут.
Ауэ щыхъукIи, апхуэдиз псынщIагъэ зиIэу и джэлэсым екIэрэхъуэкIынкIэ хъуну щыта ЩIы Хъурейм и щхьэфэм, фIэкIыпIэншэрэ зэпымыууэ, жьапщэ инхэм зыкъыщаIэтынут, хыхэри ямылейуэ къыщыукъубеинут. Абы къикIыр аращи, ди планетэм мы зэманым тепсэукI псэущхьэхэм я нэхъыбапIэм ар яхуэхьынутэкъым, языныкъуэхэри къыщымыунэхуххэнкIэри хэтт. 
 
   
 
КЪУМАХУЭ Аслъэн.
  • 13 просмотров
Поделиться: