Зызыужьхэм ядоIэпыкъу

Урысей Федерацэм и Президент Путин Владимир къыхилъхьа «Хьэрычэт Iуэху мыинымрэ курытымрэ, уней хьэрычэт щIэн жэрдэмхэр» лъэпкъ пэхуэщIэм ипкъ иткIэ, Къэбэрдей-Балъкъэрым и ЩIыналъэ инжиринг центрым республикэм и IуэхущIапIэхэм инженер-чэнджэщ IуэхутхьэбзэхэмкIэ къэрал дэIэпыкъуныгъэхэр ярет, зэрызаужьыну щIыкIэм, къыщIагъэкI продукцэмрэ ахэр зэрылажьэ технологиехэмрэ егъэфIэкIуэным, щIэуэ щыIэхэр хэпщэным, къалъыкъуэкI ныкъусаныгъэхэр гъэкIуэдыным, лэжьыгъэ IэнатIэр зегъэкIуэным хуэгъэпса Iэмалхэр фейдэ хэлъу къагъэсэбэпа зэрыхъуным, нэгъуэщIхэми ехьэлIахэмкIэ защIегъакъуэ. 

КъБР-м и ЩIыналъэ инжиринг центрыр «Си хьэрычэт IэнатIэ» республикэ центрым хохьэ икIи 2023 гъэм ар Налшык къалэм дэт, «ТД Нальчик-Сладость» IэфIыкIэ фабрикэм и лэжьыгъэр егъэфIэкIуэным ехьэлIа IуэхугъуэхэмкIэ дэIэпыкъуащ.
А фабрикэм и лэжьыгъэр 2004 гъэм иригъэжьащ икIи абы къыщIигъэкI IэфIыкIэ лIэужьыгъуэхэмрэ IэфIыкIэхэкIхэмрэ республикэм имызакъуэу, къэралым и нэгъуэщI щIыналъэ куэдми фIыуэ къыщацIыху хъуащ икIи щIэупщIэшхуэ щаIэщ. Псалъэм папщIэ, зефирым, мармеладым, шоколадым къыхэщIыкIа кIэнфет лIэужьыгъуэхэм, ирисым, хьэлывэм, пыченэхэм, мэрэзейм, нэгъуэщIхэми. 
НобэкIэ IуэхущIапIэм зэрызиужьынум ехьэлIа план убзыхуа иIэжщ, абы тету мэлажьэ икIи къыщIигъэкI IэфIыкIэ лIэужьыгъуэхэм, щэхуакIуэхэр нэхъыбэу зыщIэупщIэхэм, фIагъ лъагэ зиIэ щIэ куэд къызэрыхигъэхьэным хущIэкъу зэпытщ. Абыхэм ящыщщ КъБР-м и ЩIыналъэ инжиринг центрыр зэдигъэпыкъуу начинкэ зэрылъ шоколад лIэужьыгъуэщIэхэр къыщIигъэкIыну производствэр зэтриублэну, абы къыдэкIуэу технологие лэжьыгъэхэр иригъэфIэкIуэну, фабрикэм и зэфIэкIым зригъэубгъуну.