Уэрамиблым я гъуэгухэм яужь йохьэ

«ГъуэгуфI шынагъуэншэхэр» лъэпкъ пэхуэщIэм хыхьэу Налшык къалэм и уэрамхэр зэпэщ щIыным ехьэлIауэ ирагъэкIуэкI лэжьыгъэхэм мы гъэми пащэнущ. Иджы абы хиубыдэнущ къалащхьэм и уэрамибл. Абыхэм тетщ къалэдэсхэм я дежкIэ социальнэ мыхьэнэ зезыхьэ IуэхущIапIэхэр - курыт еджапIэхэр, сабий садхэр, сымаджэщхэр, поликлиникэхэр, щэнхабзэм пыщIа IуэхущIапIэхэмрэ спорт ухуэныгъэхэмрэ, нэгъуэщIхэри.

Лэжьыгъэхэр щрагъэкIуэкIынущ 2-нэ Таманскэ дивизием, Осетинскэ, Балкарскэ уэрамхэм, Къэзанокъуэм, Хъураным, Мусукаевым я цIэхэр зезыхьэ уэрамхэм, «ЩIалэгъуэ» уэрам дэдзыхыпIэм. Мы щIыпIэхэм телъ асфальтыжьыр зэрахъуэкIыну къудейкъым, атIэ лъэс лъагъуэхэри яукъуэдиинущ, цIыхухэм зыщагъэпсэхун «щхъуантIапIэ» плIанэпэхэри къыхагъэщхьэхукIынущ. Апхуэдэуи «Уафэ къабзэ» программэм хыхьэу гъуэгубгъухэр иджырей уэздыгъэхэмкIэ къызэщIагъэблэнущ, машинэ гъэувыпIэхэри къызэрагъэпэщынущ.

ЩIыналъэ гъуэгу фондым къыхэкIыу Брамтэ жылэм и Профсоюзнэ уэрамым зрагъэубгъунурэ «КъуэкIыпIэ» хьэблэщIэм ар нагъэсынущ.

Фигу къэдгъэкIыжынщи, лъэпкъ пэхуэщIэхэр Урысей Федерацэм и Президент Путин Владимир къыхилъхьащ икIи 2019 гъэм щегъэжьауэ мэлажьэ.