Тэрч щIыналъэм Iэ щаIэт

Урысей Федерацэм и президент хэхыныгъэхэр иджы япэу махуищым тещIыхьауэ ирагъэкIуэкI. Къэрал псом я гъусэу, Къэбэрдей-Балъкъэрым щыпсэухэми Урысейм и къэкIуэнум папщIэ Iэ яIэт.

Дыгъуасэ, хэхыныгъэхэм и япэ махуэр, лэжьэгъуэу техуами, республикэм щыпсэухэм жыджэру Iэ зэраIэтар къагъэлъагъуэ. Унагъуэхэр, лэжьакIуэхэр гуп-гупурэ хэхыпIэхэм екIуэлIащ. ЗыкъыкIэрамыгъэхуу IэIэтым хэтщ ди нэхъыжьыфIхэри, СВО-м къулыкъу щызыщIэхэри, щIалэгъуалэри. Фигу къэдгъэкIыжынщи, ди щIыналъэм псори зэхэту хэхыпIэ 355-рэ щолажьэ.

Тэрч районым хыхьэ Акъбащ Ипщэ къуажэм «Щэнхабзэ» лъэпкъ Iуэхум хыхьэу, иджыблагъэ зыхуей щыхуагъэзэжа ЩэнхабзэмкIэ унэм IэIэтыр къыщызэрагъэпэщащ. Жылэм я нэхъыжь Шэрыб Хьэжбий и щапхъэкIэ игъэлъэгъуащ къэралым и къэкIуэнур зэлъыта апхуэдэ Iуэхум хэтын зэрыхуейр. Къуажэ амбулаторэм и медицинэ лэжьакIуэхэми, зэгъусэу Iэ яIэтмэ яфIэфIу, хэхыныгъэхэм кIуащ.

Апхуэдэ дыдэу екIуэкI Iуэхум иригушхуэу, Курп Ипщэ къуажэм дэс Ащхъуэт лъэпкъым я лIыкIуэхэм къэралым и Президент хъуну зыхуагъэфащэм папщIэ Iэ яIэтащ. Жыджэру хэхыныгъэхэм йокIуалIэ къуажэдэс псори. «Президент хэхыныгъэхэм мыхьэнэшхуэ яIэщ, къэралым абы зыдиузэщIыну дыщогугъ», - жеIэ Курп Ипщэ къуажэм дэс Хьэрэдурэ Анатолэ.

Ботэщей (Плановскэ) къуажэми и хэхыпIэхэм жылэдэсыр нэжэгужэу йокIуалIэ. Абыхэм я зым Iэ щиIэтащ Къэбэрдей-Балъкъэрым промышленностымкIэ щIыхь зиIэ и лэжьакIуэ, «Тэрч налмэс» заводым и ветеран Белгъуш Эдуард. Къуажэм я нэхъыжьыфIхэм ящыщ Болэ Вери и пхъурылъхум ипхъу цIыкIур здишэри, хэхыныгъэхэм хэтащ.

ХэхакIуэхэм я нэхъыбэм Iэ здаIэтхэм ящыщщ Красноармейскэ къуажэри. Урысейм и Президентыр хахыну Iэ щаIэт щIыпIэм унагъуэурэ макIуэ. Къуажэм и щIыпIэ администрацэм и Iэтащхьэ Iэтэ Андрей хэхыныгъэхэм и япэ махуэм и щхьэгъусэр и гъусэу Iэ иIэтащ. ХэхыпIэм екIуэлIахэм яхэтащ къуажэм я нэхъыжь Сэрахъэ Руслани.

Пщэдджыжьым щегъэжьауэ IэIэтыр жыджэру щокIуэкI Тамбовскэ къуажэм и хэхыпIэ № 265-м. ХэхакIуэхэм захуигъэзащ педагогикэ IэнатIэм и ветеран, Акъбащ Ищхъэрэ, Тамбовскэ къуажэхэм щIыхь зиIэ я цIыху Хьэцым Уэлий. Абы къызэхуэсахэр къыхуриджащ Урысей Федерацэм и Iэхухэр езыгъэфIэкIуэфыну зыхуэфащэр къыхахыну. Апхуэдэуи жыджэру Iэ яIэтыну районым щыпсэухэр къыхуриджащ Акъбащ Ипщэ къуажэм щIыпIэ унафэр зехьэнымкIэ и советым и депутат КIэрэф Рустам.

Дей къуажэм и хэхыпIэ № 97-м Iэ щызыIэта, «Тэрч налмэс» заводым и ветеран ГъукIакъуэ Музэ къэрал псом щыпсэухэм ехъуэхъуащ: «Нобэ мы махуэ дахэм хэхыныгъэхэм дыхэтыну Дей къуажэм дэс дэтхэнэри дыгуфIэу-дыгушхуэу, фIым дыщыгугъыу дыкъекIуэлIащи, тхуэмахуэн Тхьэм ищI. ЦIыхум я гур нэхъ къызэрыгъуэтыжауэ, мы гъатхэм дызэрыщыгугъыр къыдэхъулIауэ тлъэгъуну къыщIигъэкI!» - жиIащ абы.

Урысейм и президент хэхыныгъэхэм иджы япэу хэтащ «Пэрытхэм я зэщIэхъееныгъэ» урысейпсо щIалэгъуалэ зэгухьэныгъэм и къудамэм хэт Шэрыб Тембулати.

Я узыншагъэкIэ хэхыпIэхэм емыкIуэлIэфхэм я унэм деж Iэ щаIэтыну Iэмал яIэщ. ХэхакIуэ комиссэм и лIыкIуэхэр абыхэм яхуоблагъэ, дэтхэнэми и Iуэху еплъыкIэр къэлъыта хъун папщIэ.