Хэхыныгъэхэр хабзэм тету йокIуэкI

Урысей Федерацэм и Президентым и хэхыныгъэхэр мы махуэхэм жыджэру икIи зэIузэпэщу йокIуэкI. Налшык къалэм и курыт еджапIэ №29-м къыщызэIуаха хэхыпIэ №112-м а Iуэхум зэрыщехъулIэм зыхэдгъэгъуэзащ. Абы йокlуалlэ «Горнэ» хьэблэм и уэрам щхьэхуэхэм щыпсэухэр.
КъэпщытакIуэ гупым и унафэщI Бэрокъуэ Эдуард къызэрыджиIамкIэ, пщэдджыжьым сыхьэти 8-м щыщIэдзауэ 20 пщIондэ я хэхыпIэм цIыху куэд щызэблокI икIи Iуэхур зэIузэпэщу къызэрагъэпэщ, Урысеймрэ Къэбэрдей-Балъкъэрымрэ я гимным щIэту. Махуищым екIуэкI тхыдэ къэхъугъэм мыхьэнэшхуэ иIэщ, илъэс дызыхуэкIуэхэм ди къэралым, щIыналъэм я къэкIуэнур елъытэжащи.
ЦIыхухэр жыджэру IэIэтым зэрыхэтыр, къэралым и къэкIуэнум зэригъэгузавэр гуапэщ. ХэхыпIэм нэхъыжьыфIхэри, курыт ныбжьым итхэри, я бынхэр ящIыгъуу, щIалэгъуалэри куэду йокIуалIэр. Нэхъыбэм пщэдджыжьым пIащIэу IэIэтым зрагъэхьэлIэ, лэжьыгъэ IэнатIэм и пэ къихуэу. Абыхэм я шынагъуэншагъэмрэ хабзэр къызэпымыудынымрэ я нэIэ тетщ хабзэхъумэ IэнатIэхэм я лэжьакIуэхэм, хэхакIуэ комиссэм хэтхэм, кIэлъыплъакIуэхэм. Нэхъыщхьэращи, хэхыпIэм хабзэр къыщызэпыуда къэхъуакъым. ХэхыпIэр зэрекIуэкIыр наIуэщ, видеоIэмалкIэ къызэгъэпэщауэ. КъыжыIапхъэщ, хэхакIуэхэм, кIэлъыплъакIуэхэм папщIэ хъыбар, тхыгъэ щхьэпэхэр щызэхуэхьэса стенд хэхыпIэм зэрыщагъэувар, УФ-м и Президентым и кандидатхэу Даванков Владислав, Путин Владимир, Слуцкий Леонид, Харитонов Николай сымэ ятеухуа тхыгъэхэмрэ сурэтхэмрэ щIыгъужу.