Нэхъри зеужь

Республикэ клиникэ сымаджэщым щекIуэкIащ IуэхущIапIэр блэкIа илъэсым зэрылэжьар къыщапщытэж зэIущIэ. Абы и лэжьыгъэм хэтащ КъБР-м узыншагъэр хъумэнымкIэ и министр Къалэбатэ Рустам, КъБР-м и Парламентым и УнафэщIым и къуэдзэ Къардэн Мурат, ФIэкIыпIэ зимыIэ медицинэ страхованэмкIэ щIыналъэ къудамэм и унафэщI Къуэжей Рустам сымэ.

- Узыншагъэр хъумэнымкIэ IэнатIэм мылъкушхуэ токIуадэ, унэтIыныгъэм зиужьынымкIэ икъукIэ дэIэпыкъуныгъэшхуэ къыбгъэдокI Урысей Федерацэм и Президент Путин Владимир. Къэрал УнафэщIым и жэрдэмкIэ къыхалъхьа «Узыншагъэр хъумэн» лъэпкъ проектым и фIыгъэкIэ Къэбэрдей-Балъкъэрми къэралым и нэгъуэщI хэгъэгухэми медицинэ IуэхущIапIэщIэхэр щаухуэ, IэнатIэхэм зэгъэпэщыжыныгъэ лэжьыгъэхэр щрагъэкIуэкI, иджырей IэмэпсымэхэмкIэ къызэрагъэпэщ, - жиIащ министрым. – Апхуэдэу щIыналъэм узыншагъэр хъумэнымкIэ и IэнатIэр ефIэкIуэнымкIэ сыт и лъэныкъуэкIи щIэгъэкъуэн мэхъу республикэм и Iэтащхьэ КIуэкIуэ Казбек. «Узыншагъэр хъумэн» лъэпкъ проектым и фIыгъэкIэ иджыпсту Республикэ клиникэ сымаджэщыр къызэгъэпэщащ щхьэ куцIым щызекIуэ лъым иIэ сэкъатыр къэхутэнымкIэ, а узыфэр зыпкърытхэм я узыншагъэр егъэфIэкIуэжынымкIэ фIагъышхуэ зиIэ IэмэпсымэхэмкIэ.

Республикэ клиникэ сымаджэщым и дохутыр нэхъыщхьэ Тет Хьэсэнбий тепсэлъыхьащ блэкIа илъэсым IэнатIэр зэрылэжьам. Узыфэ зэмылIэужьыгъуэ куэдым щеIэзэ щIыналъэ сымаджэщ нэхъыщхьэм унэтIыныгъэ 18-кIэ цIыхухэм медицинэ дэIэпыкъуныгъэ щрат. IуэхущIапIэр корпусиблу зэхэтщ, стационар къудамэу 18, параклиникэ IэнатIэу 4 иIэщ. Жэщми махуэми лажьэ къудамэм гъуэлъыпIэ 564-рэ щIэтщ, махуэ стационарым – 30.

2023 гъэм сымаджэщым хирургие дэIэпыкъуныгъэ щагъуэтащ сымаджэ 13 523-м, абы щыщу 1103-м фIагъ лъагэ зиIэ технологиехэр зи лъабжьэ Iуэхутхьэбзэхэр хуащIащ. Телемедицинэ чэнджэщу 687-рэ ирагъэкIуэкIащ, КТ къэпщытэныгъэхэр хуащIащ цIыху 15831-м, МРТ къэхутэныгъэхэр – 5698-м. Сымаджэщым щIэлъу дунейм ехыжхэм я бжыгъэр процент 1,9-кIэ нэхъ мащIэ хъуащ.

Тет Хьэсэнбий къытеувыIащ сымаджэхэм псынщIэу дэIэпыкъуэгъу щахуэхъу къудамэщIэ яухуэм и лэжьыгъэр зэрыщытынум. Сымаджэщым и къудамэщIэм пIащIэгъуэкIэ кърашэлIахэм я узыншагъэр псынщIэу къыщахутэфынущ икIи я узыр зыхуэдэм, и щытыкIэм и хьэлъагъым елъытауэ адэкIэ къыщеIэзэнур яубзыхунущ.

Метр зэбгъузэнатIэу мин 1,2-м щIигъу щIыналъэм тращIыхьыну унэр сымаджэхэм я тыншыпIэм хуэщIауэ щытынущ. Абы хэтынущ операцэ щащI, реанимацэ пэшхэр, къищынэмыщIауэ, лъэрытет сымаджэхэмрэ зи щытыкIэр нэхъ хьэлъэхэмрэ щаIыгъ щIыпIэхэр зэщхьэщыхауэ щытынущ. Къудамэм иIэнущ иджырей IэмэпсымэхэмкIэ къызэгъэпэща диагностикэ пэш, КТ, УЗИ аппарат лъэщхэмкIэ къызэгъэпэщауэ. Сымаджэхэр мыбдеж щаIыгъынущ махуищым нэблагъэкIэ – и щытыкIэр зыхуэдэр зэхагъэкIыу адэкIэ къыщеIэзэну къудамэм ягъэкIуэхукIэ. Абы Iэмал къаритынущ хирургие и лъэныкъуэкIэ лэжьыгъэр зэтеублауэ екIуэкIынымкIэ, сымаджэщым и зэфIэкI псори нэсу къагъэсэбэпынымкIэ. Сымаджэщым и унищри – щхьэ зытелъ зэпрыкIэпIэкIэ зэпыщIауэ щытынущ, абы ипкъ иткIи сымаджэ хьэлъэхэр здагъэкIуэну къудамэхэм нэхъ тыншу яшэнущ. Апхуэдэ Iуэху бгъэдыхьэкIэхэм я фIыгъэкIэ пIащIэгъуэкIэ медицинэ дэIэпыкъуныгъэ хуэныкъуэхэм нэхъ псынщIэу Iуэхутхьэбзэхэр хуащIэфынущ.

Къалэбатэ Рустам жиIащ иджырей технологиехэр къагъэсэбэпу фIагъ лъагэ зиIэ медицинэ Iуэхутхьэбзэхэр цIыхухэм яхуэзыщIэ IэщIагъэлIхэм зэфIэкI хъарзынэхэр къызэрагъэлъагъуэр, апхуэдэу къыхигъэщащ Травматологиемрэ ортопедиемкIэ къудамэм, Лъынтхуэ узыфэхэм щеIэзэ щIыналъэ центрым лэжьыгъэ щхьэпэ зэрыщекIуэкIыр, IэнатIэр зыхуей хуэзэу зэрызэтеублам и фIыгъэкIэ республикэм и цIыхухэр къалэшхуэхэм щыIэ клиникэхэм мыкIуэу щIыналъэм зыхуей дэIэпыкъуныгъэр зэрыщагъуэтыр.

ЗэIущIэм къыщагъэлъэгъуащ мы илъэсым IэнатIэм зыхуигъэувыжа къалэнхэр, гулъытэ нэхъ зыхуащIыну унэтIыныгъэхэр. Абы теухуауэ министрым пщэрылъ зыбжанэ ящищIащ, ахэр щызэфIагъэкIыну пIалъэри къагъэлъэгъуащ.