Зыщиужь зэпытщ

Урысей Федерацэм ТуризмэмкIэ и министерствэм и IэщIагъэлIхэм къызэралъытэмкIэ, ди гъунэгъу Къэрэшей-Шэрджэсым а унэтIыныгъэм нэхъри зыщиужьынымкIэ IэмалыфIхэр щыщыIэщ. А хэгъэгум зыщызыгъэпсэхуну кIуэхэм я бжыгъэр кIуэ пэтми нэхъыбэ зэрыхъури а псом я фIыгъэщ.

«Интерфакс - Ипщэ» хъыбарегъащIэ IэнатIэм къызэритам тетщIыхьмэ, къэунэхуа 2020 илъэсыщIэм ди гъунэгъу республикэм зыщызыгъэпсэхуну кIуэну цIыхухэм я бжыгъэр гъэ блэкIам елъытауэ проценти 6 - 7-кIэ нэхъыбэнущ, е, нэгъуэщIу жыпIэмэ, миллион 1,6-м нэблэгъэнущ.
КъШР-м туризмэмкIэ, курортхэмрэ щIалэгъуалэ политикэмкIэ и министрым и къуэдзэ Селипетов Павел зэрыжиIэмкIэ, а хэгъэгум турист нэхъыбэ къекIуалIэ щIэхъуар, и зыгъэпсэхупIэхэр иджырей мардэхэм къитIасэу зэгъэпэщыным, зегъэужьыным зэпымыууэ зэрегугъурщ.
Зэраубзыхуам тету екIуэкIмэ, мы щIыналъэм щыщыIэ бгы-лыжэ курортхэм я хьэщIэщхэм, цIыху нэхъыбэжым зыщагъэпсэхуфын хуэдэу, зэман гъунэгъум къриубыдэу адэкIи къыпагъэхъуэнущ, Домбай тIуащIэм иджыри зы кIапсэ гъуэгу щаухуэнущ, щIымахуэ лъэхъэнэм къриубыдэу уафэм псыIагъэ къыщемыххэм деж, джабэ нэкIухэр уэс IэрыщIкIэ зысеин Iэмэпсымэхэр щIыпIэ-щIыпIэкIэрэ щагъэувынущ.
REGNUM хъыбарегъащIэ IэнатIэм къызэритамкIэ, Архъыз зыгъэпсэхупIэ къудейр къэтщтэнщи, ИлъэсыщIэм теухуа гуфIэгъуэ махуэхэм ирихьэлIэу а щIыпIэм цIыху мин 50-м щIигъум я нэгу зыщрагъэужьащ. 2019 гъэм ди гъунэгъу республикэм зыщызыплъыхьыну кIуахэм я бжыгъэр миллион 1,5-м щхьэдэхащ.