МэжджытыщIэм и теплъэр зыхуэдэнур

Налшык къалэм щаухуэну Мэжджы­тышхуэм и теплъэ хъунур архитекторхэм къыщагъэ­лъэгъуа проектхэм я гъэлъэ­гъуэныгъэм щыIащ КъБР-м и Iэтащхьэ КIуэкIуэ Казбек. 

Налшык и «КъуэкIыпIэ» хьэблэм ПщыхьэщIэ Iэнас и цIэр зэрихьэу ди республикэм щаухуэну Мэжджытышхуэм и япэ мывэр блэкIа илъэсым и шыщхьэуIум ягъэтIылъакIэщ. КъБР-м и Iэтащхьэ КIуэкIуэ Казбек накъыгъэм и 30-м еблэгъащ абы ­игъуэтыну теплъэр зыхуэдэнур къызэрыщ сурэтхэр утыку къыщрахьа гъэлъэгъуэныгъэм. 
Архитекторхэм Мэжджытышхуэм и проектитху ягъэхьэзыращ. Абыхэм дэтхэнэ зыри щеплъыфынущ КъБР-р илъэси 100 зэрырикъуам и щIыхькIэ къызэIуахауэ щыта, иджырей гъуазджэм и гъэлъэгъуапIэм. Абы екIуэлIэнухэм я Iуэху еплъыкIэм мыхьэнэ иIэнущ проектхэм я зэпеуэм щытекIуар щаубзыхукIэ. Ар и пщэ делъхьэж къэпщытакIуэ комиссэм. Мыгувэу наIуэ къэхъунущ проект нэхъыфI дыдэр дэтхэнэрами.