НыбжьыщIэр ягъэгуфIащ

Урысей МВД-м Шэрэдж районым щиIэ къудамэм и къэрал автоинспекцэм и лэжьакIуэхэм гъуэгум зэрыщызекIуэ хабзэм теухуа дерсхэр школхэм щрагъэкIуэкIащ гъэ еджэгъуэм къриубыдэу. 

Апхуэдэ зэIущIэхэм ящыщ зым инспектор ныбжьыщIэ Чочаев Имран полицейхэм яжриIауэ щытат къэрал автоинспекцэм и лэжьакIуэ хъуным зэрыщIэхъуэпсыр. Ар къыщащIэм, автоинспекторхэм мурад ящIащ сабийр ягъэгуфIэну – я лэжьэгъу хъуну мурад зыщIа щIалэ цIыкIум къыщалъхуа махуэмкIэ егуэпэну.
Полицэм и лэжьакIуэхэр абы и унэм кIуэри, я къудамэм и лэжьакIуэхэм къабгъэдэкIыу ехъуэхъуащ узыншагъэ быдэ иIэну, еджэным ехъулIэныгъэ щиIэну, къыхураджащ и мурадым къытемыкIыу, Къэрал автоинспекцэм и лэжьакIуэхэм я сатырхэм къыхыхьэну. 
Автоинспекторхэм Имран щыгъуазэ ящIащ гъуэгу-плъыр къулыкъум и автомашинэр къызэрызэгъэпэщам, Iэмал игъуэтащ абы исыну икIи макъыр ину зыгъэIу Iэмэпсымэр къигъэсэбэпри, и ныбжьэгъухэм захуигъэзащ гъуэгум зэрыщызекIуэ хабзэм тетыну. 
ЩIалэ цIыкIум полицейхэм фIыщIэ яхуищIащ зэрагъэгуфIам папщIэ икIи я къулыкъур тыншу ирахьэкIыну ехъуэхъуащ.