МэракIуэIэрысэр кърахьэлIэж

Республикэм мы махуэхэм щоужьэрэкI мэракIуэIэрысэр къехьэлIэжыным ехьэлIа лэжьыгъэхэм. ЦIыхум фIыуэ ялъэгъуа а шхыныгъуэ гуакIуэр, гурыхьыр, абыхэм къадэкIуэу, цIыхум и узыншагъэмкIи сэбэпышхуэр ди щIыналъэм щимызакъуэу, къэралым и щIыналъэ куэдми я сату щIыпIэхэм ар щащэ, Мэзкуу, Санкт-Петербург къалэхэри яхэтыжу. 
ЩIэныгъэм тет Iуэху бгъэдыхьэкIэм и фIыгъэкIэ, иджыпсту ди щIыпIэм къыщагъэкI мэракIуэIэрысэ лIэужьыгъуэхэр нэхъ пасэу къэхъу, пIалъэ кIыхькIэ Iуахыж, цIыхухэм я Iэнэм нэхъыбэрэ телъ хъуащ. МэракIуэр республикэм къыщагъэкI мэкъумэш, фермер, уней IуэхущIапIэхэм, унагъуэхэм. Апхуэдэуи ди губгъуэхэм щыхащIэ щIымэракIуэр, щхъырыбыр, шыгъулдыкъащхъуэр, санэр икIи гъавэ бэвхэр кърахьэлIэж хабзэщ.
Ди щIыналъэм мэракIуэ лIэужьыгъуэхэр зытращIэ щIыр гектар мин 0,8-рэ нобэкIэ мэхъу. 2023 гъэм псори зэхэту мэракIуэ лIэужьыгъуэу кърахьэлIэжащ тонн мини 6,5-рэ е 2022 гъэм щыIа бжыгъэхэм нэхърэ процент 18-кIэ нэхъыбэ.