Губгъуэ лэжьыгъэхэр зэрекIуэкIым топсэлъыхь

Урысей Федерацэм и Правительствэм и УнафэщIым и къуэдзэ Патрушев Дмитрий УФ-м Мэкъумэш хозяйствэмкIэ и министерствэм иджыблагъэ зэIущIэ щригъэкIуэкIащ. Видео зэпыщIэныгъэ Iэмалхэр къигъэсэбэпу абы и лэжьыгъэм хэтащ Къэбэрдей-Балъкъэрым мэкъумэш хозяйствэмкIэ и министр Сыжажэ Хьэсэн.

ЗэIущIэм щытепсэлъыхьащ губгъуэ лэжьыгъэхэм щIыналъэхэм зэрыщеужьэрэкIым, иужьрей тхьэмахуитIым дунейр нэхъ щIыIэ къызэрыхъуам хьэсэхэм зэраныгъэ иратарэ ирамытарэ.

Патрушев Дмитрий къызэрыхигъэщамкIэ, губгъуэ лэжьыгъэхэр къэралым и щIыналъэ псоми иджыпсту щокIуэкI икIи нобэкIэ гъатхасэр гектар мелуан 25-м тращIащ. Ар къалэну мы гъэм зыхуагъэувэжам и зэхуэдитIым ноблагъэ. Ауэ мы махуэхэм языныкъуэ щIыналъэхэм къыщытезыгъэзэжа щIыIэр зэран зыхуэхъуахэри щыIэщ. Абы хэтщ Центральнэ, Приволжскэ округхэр, Волгоград, Ростов областхэр. Патрушевым а щIыналъэхэм я унафэщIхэр къыхуриджащ епIэщIэкIыу гъавэр щIэрыщIэу трасэжыну, абы щхьэкIэ щыIэ агротехнологие пIалъэхэм фIамыгъэкIыу.

Къэбэрдей-Балъкъэрым щIыIэр гъавэм зэран къызэрыхуэхъуа щыIэкъым, ауэ губгъуэ лэжьыгъэхэр тIэкIу къызэтрагъэувыIэн хуей хъуами, зыхуагъэувыжа пIалъэм ирихьэлIэу ахэр зэфIагъэкIынущ.