Урысей Федерацэм и щIыналъэщIэхэм щыщ цIыху 50-м щIигъум нейрохирургие и лъэныкъуэкIэ щыдэIэпыкъуащ Тэн Iус Ростов къалэм Лышх узыфэхэмкIэ дэт щIэныгъэ IуэхущIапIэм.
УФ-м УзыншагъэмкIэ и министерствэр а щIыналъэщIэхэм я дохутырхэм дэлэжьэн щIадзащ 2023 гъэм, Мурашкэ Михаил и унафэкIэ онкоцентрым и лэжьакIуэхэр Донбасс щыкIуам щегъэжьауэ.
- БлъэкIа илъэсрэ ныкъуэм къриубыдэу ди онкоцентрым нейрохирургиемкIэ и къудамэм дыщеIэзащ Донецк, Луганск республикэхэм, Запорожскэ, Херсон областхэм щыщу цIыху 50-м щIигъум. НобэкIэ щыIэ IэмалыщIэхэмкIэ пхуощI операцэ нэхъ гугъу дыдэу къалъытэу щытахэр. Апхуэдэу, къыбгъурылъ налъэ узыншэхэм ухэмыIэбэу къыпхухогъэж куцIым хищIа лышх шыкъырхэр. Абы и фIыгъэкIэ, цIыхум и щхьэкуцIми акъылми сэкъат игъуэтыркъым, тыншу зэфIоувэж, - жеIэ онкоцентрым и унафэщI Кит Олет.
Псантхуэ лышх лIэужьыгъуэхэм еIэзэ дохутырхэм ящыщщ радиотерапевтхэр, рентгенэндоваскулярнэ, лъынтхуэ хирургхэр, химиотерапевтхэр. Ахэр псори Ростов и онкоцентрым щыIэщ. НобэкIэ нейроонкологие къудамэм щIэлъщ УФ-м и щIыналъэщIэхэм къикIауэ цIыхуи 4.
Абыхэм ящыщу Луганск къикIа сымаджэм къефыкIырт щхьэ уз шынагъуэ. МРТ хуащIа нэужь къахутащ абы и щхьэм шыкъырышхуэ хэлъу. IуэхущIапIэм и хирургхэм ар къыхагъэжащ, псори тэмэму зэфIэкIащ, сымаджэр щIатхыкIыжыну ягъэхьэзыр.
Донецк щыщ бзылъхугъэм и лъакъуэ узыр къызыхэкIыр къахуэмыщIэу куэдрэ къеныкъуэкъуащ, къимыкIухьыжыфу къэнат, уеблэмэ. Онкоцентрым къызэрыщахутамкIэ, ар къызыхэкIар сымаджэм и пщэ тхыIупщIэхэм я зэхуакум дищIа шыкъырыр арат. Дохутрыхэм операцэ ирагъэкIуэкIын папщIэ, рентгенэндоваскулярнэ хирургхэм цIыхубзым и лъынтхуэхэр «IуащIэн» хуейт лъы куэд фIэмыкIуэдын папщIэ. Ар зэфIэкIа нэужьщ нейрохирургхэм шыкъырыр къыщыхагъэжар. Операцэр хъарзынэу зэфIэкIауэ жаIэ, сымаджэм къекIухь.
Запорожскэ областым къикIа бзылъхугъэм нэхъапэIуэкIэ и щхьэм къыхахат шыкъыр. Иджы абы къыхэна лъэхъцхэм заубгъуарэ Iей хъужауэ, лышхым хуэкIуэжауэ Ростов сымаджэщым екIуэлIат. Онкоцентрым и дохутырхэм ар зэрыщыту къыхахащ, сымаджэм луч терапие къыпэщылъщ.
НэгъуэщI сымаджэм, Запорожскэ областым къикIа цIыхухъум, рулым дэсу и Iэр иубыдри, ерагъыу машинэр къигъэувыIауэ аращ. ДэIэпыкъуэгъу псынщIэкIэ ар Симферополь нагъэсри, МРТ ящIати, и щхьэм шыкъыр хэлъу къахутащ. Ростов дохутырхэм ар къыхагъэжат, ауэ цIыхухъум тромбоз иIэу къыщIэкIати, етIуанэ махуэм хирургхэм операцэ ящIри, филътр хагъэуващ и лъынтхуэм.
