ТхакIуэр ягу къагъэкIыжащ

Кулиев Къайсын и цIэр зезыхьэ балъкъэр къэрал драмтеатрым щекIуэкIащ тхакIуэ Чипчиков Борис теухуа гукъэкIыж пшыхь. Ар къызэралъхурэ илъэс 75-рэ ирокъу. 

Чипчиковыр тхэрт балъкъэрыбзэкIи урысыбзэкIи. «Си псэм зыхищIэрщ сызытетхыхьыр», - жиIэу щытащ езы тхакIуэм. «Возвращайся свободным», «Улыбается Боже», «Нерестились рыбы в лунном свете», «Мы жили рядышком с Граалем» - мыпхуэдэ рассказхэр яцIыху куэдым. Литературэджхэм къыхагъэщ абы и тхыгъэхэм щIэщыгъуэ зэрахэлъыр, хъэтI гурыхь зэриIар, къигъэлъагъуа гуп­сы­сэхэм купщIэ зэраIэр. 
Iуэхум кърихьэлIащ тхакIуэм и щIэджы­кIакIуэхэр, и благъэ-Iыхьлыхэр, тхакIуэхэр, литературэхутэхэр, журналистхэр. 
Пшыхьыр ирагъэкIуэкIащ ЩэнхабзэмкIэ урысей Федерацэм щIыхь зиIэ и лэжьакIуэ котляровэ Мариерэ КъБР-м щIыхь зиIэ и журналист Аттаев Азноррэ.
- Сэ куэдрэ сыдэлэжьащ Борис. Нэхъ цIыху зэпIэзэрыт уигъэлъыхъуэнут, пэжым тетт. Тхьэм фIыщIэ хузощI ар си гъащIэм зэрыхэтам папщIэ, Борис псалъэ гуапэ зысхутритха тхылъ­хэр сызэриIэмкIи согушхуэ, - жиIащ ­КъБР-м щэнхабзэмкIэ и министр Къумахуэ Мухьэдин къыщыпсалъэм.
ТхакIуэм и IэдакъэщIэкIхэр хъэтI щIэщыгъуэкIэ зэрыгъэпсам, художественнэ Iэмалхэр екIуу къызэрыщыгъэсэбэпам, купщIэ зэ­раIэм тепсэлъыхьащ филологие щIэныгъэхэмкIэ док­тор, профессор Гъут Iэдэм.
- Псалъэм и купщIэр телъыджэу дэзыгъэ­лъэгъуа тхакIуэр ди щIыналъэм къызэрыщалъ­хуар дэ ди къулеягъэщ, - къыхигъэщащ ­КъБР-м и цIыхубэ усакIуэ Беппаев Муталип къыщыпсалъэм. 
- Сэ сфIэфIщ Чипчиков Борис и Iэдакъэ­щIэкIхэр щIэзджыкIыну. Абыхэм сыт щыгъуи щIэрыщIэу ущрохьэлIэ гупсысэ щIэщыгъуэ­хэм, - къыхигъэщащ «Литературная Кабардино-Балкария» журналым жэуап зыхь и секретарь Хьэту Пётр. 
Урысей Федерацэм щIыхь зиIэ и артист Таукеновэ Галинэ жиIащ Чипчиковым и тхыгъэхэр нэхъыбэ дыдэу дызэджэн хуейхэм ящыщу къызэрилъытэр.
- Ахэр псэм лъоIэсыф, гупсысэр нэху ящI, - жиIащ абы. 
Артистхэр къеджащ Чипчиков Борис и тхыгъэхэм къыхаха пычыгъуэхэр. Пшыхьыр республикэм и уэрэджыIакIуэхэм ягъэдэхащ. Къызэхуэсахэр ирагъэплъащ тхакIуэм и гъащIэм теухуа документальнэ фильмым. 

Сурэтыр Къарей Элинэ трихащ.