Къалэ цIыкIу щIэращIэ

Налшык къалэ администрацэм къегъэщIылIауэ мэлажьэ къалэм зегъэужьынымкIэ «Платформа» институтыр. Къалэр щIэращIэу щытыным кIэлъоплъ дизайнерхэр, сурэтыщIхэр, щэнхабзэм и лэжьа­кIуэхэр, архитекторхэр. «Платформа»-р унэтIыныгъэу щым тетщ: къалэм и теплъэр гъэдэхэным, туризмэм зегъэужьыным, щэнхабзэмрэ тхыдэмрэ гулъытэ хуэщIыным. 

Иджыблагъэ «Платформа» институтым щыщ архитектор ГъукIэлI Мурат хэтащ «Малые города: новые территории креативных индустрий» зэIущIэм. Ар Ивановскэ областым щекIуэкIащ. Илъэс етIуанэ хъуауэ къэралым и эксперт нэхъыфIхэр щызэхуос Юрьевец къалэми, топсэлъыхь къалэ цIыкIухэр екIуу, къабзэлъабзэу щытын папщIэ лэжьыпхъэхэм. Мы гъэм зэIущIэм хэтахэр тепсэлъыхьащ къалэр гъэщIэрэщIэ­ным, цIыхухэр щызэхуэс щIыпIэхэр зыхуей хуэгъэзэным. 
ГъукIэлI Мурат къыхигъэщащ зэIущIэр щхьэпэ зэрыхъуар, абы Iуэху еплъыкIэ щIэщыгъуэхэр зэрыщыжаIар. Архитекторыр зэIущIэм щытепсэлъыхьащ иужьрей илъэсхэм Налшык къыщыунэхуа утыкухэм, абыхэм я фIыгъэкIэ къалэм щыпсэухэм я гъащIэр нэхъ щIэщыгъуэ зэрыхъуам.
- Нэхъыщхьэращи, ар IэмалыфIщ уи IэщIагъэм теухуауэ щIэщыгъуэ къэпщIэнымкIэ, уи гупсысэ къэбгъэлъэгъуэнымкIэ. НэгъуэщIхэм я бгъэдыхьэкIэр къэпщIэнуи щхьэпэщ. Абыхэм седэIуэху, зи гугъу ящIахэм щыщу Налшык щыпхуэгъэзэщIэнухэм е екIуну-емыкIунухэм сегупсысащ, - жиIащ абы, зыхэтам и гугъу щищIыжым.