Дамыгъэр зыхуэфащэхэм иратыж

Хэку зауэшхуэм хэта цIыху 27-м «1941 - 1945 гъэхэм екIуэкIа Хэку зауэшхуэм ТекIуэныгъэ къызэрыщытхьрэ илъэс 75-рэ ирокъу» медалыр щратащ Бахъсэн районым и щIыпIэ администрацэм.

А Iуэхум хэтащ щIыналъэ унафэщIхэр, жылагъуэ, щэнхабзэ лэжьакIуэхэр, зауэм и ветеранхэмрэ абыхэм я благъэ-Iыхьлыхэмрэ, курыт еджапIэхэм щIэсхэр.
- ПщIэ зыхуэтщI ди нэхъыжьыфIхэ! Зауэ нэхъ гущIэгъуншэ дыдэм лIыгъэ къызэрыщывгъэлъэгъуам, Хэкур зэрыфхъумам папщIэ фIыщIэ псалъэкIэ нобэ зыфхуэдгъэзэну дыхуейт. Узыншагъэ быдэрэ гукъыдэжрэ фиIэну дынывохъуэхъу. Дэ ди къалэнращи, тхыдэр зэрызыщыдмыгъэгъупщэным, зауэм хэкIуэдахэм я фэеплъыр тхъумэным и ужь дитынущ. ЗэрытхузэфIэкIкIэ дыхущIэкъунщ къытщIэхъуэ щIэблэм фи лIыгъэмрэ лIыхъужьыгъэмрэ ябгъэдэтлъхьэну, - жиIащ Бахъсэн районым и щIыпIэ администрацэм и Iэтащхьэ Балъкъыз Артур.
Ислъэмей дэт курыт еджапIэ №1-м и гъэсэнхэм утыкум зыкъыщагъэлъэгъуащ, «Прощание славянки» маршыр ягъэзащIэу. ХьэтIохъущыкъуей курыт школ №3-м щIэс ныбжьыщIэхэм щэнхабзэ центрым и унафэщI Тембот Хьэчим я гъусэу жаIащ «От героев былых времён» уэрэдыр.
КъыхуащIа гулъытэр зэрагъэлъапIэр къыхигъэщу къэпсэлъащ Ислъэмей жылэм я ветеран Елдар Хьэрэбий.
Гу зылъытапхъэ: ТекIуэныгъэ Иныр илъэс 75-рэ зэрырикъум и щIыхькIэ  Бахъсэн районым щатыну я мурадщ медали 188-рэ.