Нэхъыжь уиIэхукIэ ущIалэщ

Дунейпсо Адыгэ Хасэмрэ «Къэбэрдейм и нэхъыжьхэм я совет» зэгухьэныгъэмрэ я лIыкIуэхэр Шэт (Шал) КIулэ ТIалиб и пхъум ехъуэхъуащ илъэс 96-рэ зэрырикъуамкIэ. 

ГуащIэдэкIрэ унагъуэ насыпкIэ гъэнщIа нанэ дыщэм къикIуа гъуэгуанэр нобэ ди республикэм щыпсэу дэтхэнэ зы бзылъхугъэм ­дежкIи щапхъэщ. Къуитхурэ пхъуитхурэ къа­щIэхъуащ Шэтхэ Iэдэмрэ КIулэрэ. Дэтхэнэ зыри унагъуэ щхьэхуэ хъужауэ нобэ Къэбэрдей-Балъкъэрыр ефIэкIуэным я къарур ирахьэлIэ. «Дэ ­нэхърэ нэхъ унагъуэ бей щыIэкъым, цIыху 61-рэ дохъу», - жиIэрейт ди адэм», - ягу къагъэкIыж но­бэ зэщхьэгъусэхэм я бынхэм. Къуэрылъху-пхъурылъхуу 20-рэ абыхэм я быныжу 2-рэ зэп­щIэкIа нанэ гуащIафIэм гъащIэр къехъулIауэ къелъытэ. Я малъхъэхэри нысэхэри акъылэгъу къахуэхъуауэ, псори зэгурыIуэ зэрылъ унагъуэу мэпсэу, мэлажьэ-мэшхэж, я бынхэр гъащIэм ­хуагъасэ. Илъэсищ ипэкIэ зи узыншагъэр нэхъ тIасхъэ хъуа КIулэ ипхъу Ларисэ и пщэ дилъхьэжащ анэр зыхуей хуигъэзэныр. 
Шэт КIулэ мызэ-мытIэу къэрал саугъэтхэмкIэ къыхагъэщащ: «Анэм и щIыхьыр» орденыр тIэунейрэ къратащ, «Лэжьыгъэм и ветеран» цIэ лъапIэр зэрехьэ, Хэку зауэшхуэр илъэс 60, 65-рэ, 70, 75-рэ щрикъуахэм медаль къыхуагъэфэщащ. 
НэхъыжьыфIыр ягъэлъэпIэну Къэрэгъэш еб­лэгъахэм яхэтащ Къэбэрдей лъэпкъым и нэхъыжьхэм я советым и унафэщI Джазэ Хъусен: 
«Дэ ди зэгухьэныгъэм и уставым итщ илъэс 90-м щхьэдэхар дгъэлъэпIэну. Апхуэдэ щхьэу­сыгъуэ зэрыдиIэр Сэхъурокъуэ Хьэутий щыбгъэдэслъхьэм, ар къыздиIыгъам къыщымынэу, МЧА-м и щIыхь тхылъымрэ медалымрэ я гъусэу КъурIэн къэдгъэщэху къыщызжиIам, сэ къы­затам хуэдэу сыгуфIат. Узыншэу Тхьэм уигъэ­лажьэ жызоIэ Сэхъурокъуэ Хьэутий. Лъэп­къым зыхуэзгъэзэнщи, мелуан дыхъуауэ Алыхьым ­дигъэлъагъу. Ар къыдэхъулIэн папщIэ, IэмалитI щыIэщ. Зыр - ди щIалэгъуалэм бын куэд зра­гъэгъуэтынырщ. ЕтIуанэр - Мэзкуурэ Бытырбыху­рэ лэжьакIуэ кIуахэр къэкIуэжурэ мыбдежым щыбэгъуэнырщ. Ауэ абыкIэ зэфIэкIынукъым. Абыхэм къащIэхъуа быныр адыгэбзэкIэ пса­-лъэу къэхъупхъэщ. Къэбэрдей псом зыхуэзгъэ­зэну сыхуейщ: ягъэ кIынкъым, кхъыIэ, фи бы­ным адыгэбзэкIэ фепсалъэ! Нобэ хамэбзэкIэ фы­зэпсалъэ фи быным къыщIэхъуэ езыхэм я быныжхэр пщэдей хамэ лъэпкъ хъунущ. Бзэ ­димыIэмэ, дэри дыщыIэжынукъыми, илъэс миних зи ныбжь адыгэ лъэпкъыр дыхэвмыгъэ­кIуэдэж, сыныволъэIу. Фыпсэуну, фыузыншэну, бын куэд къыфщIэхъуэну сынывохъуэхъу!»