Гъуэгуухуэхэр бэлэрыгъыркъым

«ГъуэгуфI шынагъуэншэ­хэр» пэхуэщIэм хиубыдэу ди республикэм и жылэ куэдым гъуэгухэр къыщагъэщIэ­рэ­щIэ­жащ, мывэ кIэщхъ фIэкIа зытемылъахэм асфальт тралъ­хьащ. 

Абыхэм я нэхъыбэр жыла­гъуэ къулыкъущIапIэхэм, курыт еджапIэхэм, сабий садхэм ­хуозэ. Языныкъуэ щIыпIэхэм, гъуэгу лэжьыгъэхэм къадэ­кIуэу, лъэс зекIуапIэщIэхэр ­щаухуащ. Апхуэдэу Жэмтхьэлэ ­къуажэм зыхуей щыхуагъэзащ километри 5-м щIигъу зи кIы­хьагъ гъуэгур. Абы къыща­гъэ­сэбэпа иджырей пкъыгъуэ­хэм я фIыгъэкIэ асфальтыр щIэуэ зытралъхьа гъуэгущIэ­хэр илъэс куэдкIэ зекIуэнущ.
Гъуэгухэр зэрызэрагъэ­пэ­щыжым къыдэкIуэу, светофорхэр ягъэуващ, лъэс зэпры­кIы­пIэхэр, гъуэгу дамыгъэхэр, «Жэмтхьэлэ цIыкIу» псым телъ лъэмыжым и къэухьхэр къагъэ­щIэрэщIэжащ. Гъуэгу лэ­жьы­гъэхэм я фIыгъэкIэ тынш ­хъуащ къуажэм дэт къулыкъущIапIэхэм, жылагъуэ админист­рацэм, пощтым, мэжджытым уекIуэлIэныр. 
Бабугент къуажэми щызэрагъэпэщыжащ километри 2 зи кIыхьагъ гъуэгур. Гъуэгуухуэ лэжьыгъэхэм Шэрэдж щIыналъэр километри 10-кIэ хиубыдащ. Абыхэм ящыщщ Зэрэгъыж, Балъкъэр Ипщэ къуа­жэхэр.
Километр 27-рэ зи кIыхьагъ Шэджэм ЕтIуанэ - Булунгу гъуэгум щыщу километритI зыхуей хуагъэзащ. Лэжьыгъэхэр Iы­хьэ-Iыхьэу гуэшауэ кърахьэлIэнущ 2026 гъэм нэсыху. «Гъуэ­гуфI шынагъуэншэхэр» пэхуэ­щIэм хиубыдэу зэIузэпэщ ящIащ километри 6 зи кIыхьагъ Лэскэн ЕтIуанэ - Анзорей, километр 11,5-рэ зи кIыхьагъ Ерокъуэ - Лэскэн ЕтIуанэ гъуэгу­хэри. 
Къэбэрдей-Балъкъэрым Транс­портымрэ гъуэгу хозяйст­вэмкIэ и министерствэм хъыбар къызэрыдигъэщIамкIэ, «Къа­лэ, щIыналъэ, къуажэ ­гъуэгухэр зэIузэпэщ щIын» къэрал пэхуэщIэм хиубыдащ Арщыдан къуажэм и гъуэгу ­километри 8,5-рэ. Мы гъэм ­къриубыдэу Лэскэн щIына-лъэм иджыри зыхуей щыхуа­гъэзэнущ гъуэгу километр 20-м нэс.
Бахъсэн щIыналъэр ящыщщ гъуэгухэр зыхуей хуэгъэзэным теухуауэ лэжьыгъэ нэхъыбэ къы­щрахьэлIахэм: ХьэтIохъу­щы­къуей къуажэм къыщагъэ­щIэрэщIэжащ Iэпщэм и цIэр зезыхьэ, километри 2,6-рэ зи кIыхьагъ, Ислъэмей и Надречнэ (километр 11 мэхъу) уэрамхэмрэ Чыпым и цIэр зезыхьэ уэрамдэкIымрэ. Апхуэдэ лэ­жьы­гъэхэр щызэфIагъэкIащ Жан­хъуэтекъуэ къуажэм и Октябрьскэ, Молодёжнэ уэрам­хэм, Тырныауз уэрамдэкIым.