Иратащ щIакIуэрэ адыгэ пыIэрэ

Налшык, ди республикэр илъэси 100 зэрырикъум и щIыхькIэ щыIэ паркым ит гъэлъэгъуапIэм, къы­щы­зэ­Iуахащ ХудожествэхэмкIэ Урысей академием и академик СэвкIуий Хьэмид и «Ковчег» гъэлъэ­гъуэныгъэр. Ар сурэты­щIым и илъэс 60-м и щIыхькIэ ягъэхьэзыра Iуэху­хэм ящыщ зыщ. Гъэлъэгъуэныгъэр къызэ­Iуихащ КъБР-м щэнхабзэмкIэ и министр Къумахуэ Мухьэдин. Абырэ ­КъБР-м и Прави­тельствэм и УнафэщIым и къуэдзэ Хъубий Маратрэ Сэв­кIуийм иратащ щIа­кIуэрэ адыгэ пыIэрэ. 

КъБР-м и цIыхубэ сурэ­тыщI Бгъэжьнокъуэ Заур-бэч жиIащ абдеж щагъэ­лъагъуэ псоми Хьэмид и псэм щыщ зэрыхилъхьар зэрызыхэпщIэр. Тхыдэ щIэ­ныгъэхэмкIэ доктор, профессор Дзэмыхь Къасболэт и жыIэм къыхигъэщащ СэвкIуийм и лэжьыгъэхэр гъащIэм и къуэпс гуэру, къо­джэу, удахьэхыу зэры­щы­тыр. КъБР-м и цIыхубэ сурэтыщI Жылэ Анатолэ гу лъаригъэтащ СэвкIуий ­Хьэмид и IэдакъэщIэкIхэм теухуауэ Налшык щыIэ ­гъэ­лъэгъуэ­ныгъэшхуэхэм ящIэлъ гуп­сысэр зэрыкуум, гъуазджэ хъугъуэфIыгъуэр зылъэ­гъуа къалэдэсхэм я гум дахагъэ къызэринэм. КъБР-м курортхэмрэ туриз­мэмкIэ и министр Що­джэнцIыкIу Мурат къыхигъэщащ гъуазджэм и хэлъ­хьэныгъэ телъыджэхэр ­нэхъыбэм ялъа­гъуну зэ­ры­щхьэпэр, сыту жыпIэмэ абыхэм псэу­ным укъыхуа­гъэуш. КъБР-м и СурэтыщI­хэм я зэгухьэныгъэм и уна­фэщI Къаныкъуэ Жаннэ ­ХудожествэхэмкIэ Урысей академием къыбгъэдэкI ­хъуэхъум къеджащ. Лъэп­къым и цIэкIэ къэпсэлъащ СэвкIуий Аслъэн. Абы жи­Iащ Хьэмид сыт щыгъуи ­нэхъри телъыджэ пщыхъу гуэрхэр къызэрызэкъуихыр, зэчий ин зыбгъэдэлъ ­щIалэм зэрыригушхуэр.                           
КъБР-м щIыхь зиIэ и артист Зеущэ Iэуес уэрэд дахэкIэ ехъуэхъуащ сурэ­ты­щIым.

Сурэтыр  Къарей Элинэ трихащ.