ДыщIигъуащ мин 905-м

Республикэм и Правительствэм и лIыкIуэхэр, щIыналъэ администрацэхэм я унафэщIхэр зыхэт зи чэзу зэIущIэр КъБР-м и Iэтащхьэ КIуэкIуэ Какзбек иригъэкIуэкIащ. Абы щытепсэлъыхьащ «2030 гъэ пщIондэ, къы­кIэлъыкIуэу 2036 гъэм нэсыху Урысей Федерацэм зэрызиужьыну унэтIыныгъэ нэхъыщхьэхэм я IуэхукIэ» Урысей Федерацэм и Президентым и Указыр зэрагъэзащIэм. Абы и лъабжьэр жылагъуэр хъумэнырщ, цIыхухэм я узыншагъэр, зэIузэпэщ псэукIэр егъэфIэ­кIуэнырщ, унагъуэхэр дэIыгъынырщ.

ЩIыналъэм зэпымыууэ щыпсэу цIыхухэм я бжыгъэр мин 905-м щIигъуащ. Республикэр ящыщщ нэхъ гъащIэ кIыхь зиIэ цIыхухэр щыпсэухэм – абыкIэ къэралым и хэгъэгухэм я деж 4-нэ увыпIэр щытIыгъщ. Ди щIыпIэм щыпсэухэм ику иту илъэс 78-рэ къагъащIэ. Апхуэдэу республикэр хохьэ сабий нэхъыбэ къыщалъху, дунейм ехыжхэм я бжыгъэр нэхъ мащIэу щыщыт хэгъэгуипщIым.
«Шэч хэмылъу, социально-экономикэ щы­тыкIэм зегъэужьынымкIэ, цIыхухэм я псэукIэр егъэфIэкIуэнымкIэ хэкIыпIэ нэхъыщхьэу щытыр ди Президент Путин Владимир и жэрдэмкIэ къыхалъхьа лъэпкъ проектхэрщ. Абыхэм япкъ иткIэ щIыналъэ проекту 47-рэ догъэзащIэ. Мы гъэм и япэ илъэс ныкъуэм зыхуэдгъэувыжа къалэн­-   хэр къызэрыдэхъулIэмкIэ республикэм къэралым ебланэ увыпIэр щиIыгъщ. АдэкIи абыкIэ лэжьыгъэхэр зэрекIуэкIым гулъытэ нэхъыбэ зэрыхуэфщIыным, я фIагъым, и чэзум зэфIэгъэкIыным ткIийуэ фызэрыкIэлъыплъыным иужь фит», - жиIащ КIуэкIуэ Казбек. 
Апхуэдэу къытеувыIащ щIыналъэхэм къедза щIыпIэхэр гъэкъэбзэным теухуауэ ирагъэ­кIуэкIыпхъэхэм. КIуэкIуэ Казбек пщэрылъ ящищIащ Республикэм и махуэм ирихьэлIэу щIыналъэхэр сыт и лъэныкъуэкIи зэIузэпэщ ящIыну. Лэжьыгъэм къызэщIрагъэубыдэн ­хуейщ жылагъуэ зэхуэсыпIэхэр, гъуэгу гъунэхэр, IуэхущIапIэ зэхуэмыдэхэм къызэщIаубыдэ щIыналъэхэр. А Iуэхум къыхашэнущ республикэ, щIыналъэ IэнатIэ псоми я лэжьакIуэхэр.
Iуэхугъуэ нэхъыщхьэу къыхагъэщащ гъэ еджэгъуэщIэм зэрызыхуагъэхьэзырыр. ФокIадэм и 1-м зэуэ школыщIэу 6 къызэIуахынущ, абыхэм кIуэнущ сабий мини 4-м щIигъу. Сыт и лъэны­къуэкIи зыхуей хуагъэзэжа еджапIи 6-ми а махуэм я бжэхэр къызэIуахыжынущ.
КIуэкIуэ Казбек пщэрылъ ящищIащ Къэбэрдей-Балъкъэрым и школ псоми гъэ еджэ­гъуэщIэр сыткIи зэпэщу къыщызэрагъэпэщыну.