Дзэ Iуэху хэхам щыIэхэм яIуощIэ

КъБР-м и Iэтащхьэ КIуэкIуэ Казбек яхуэзащ дзэ Iуэху хэхам и ветеранхэу Воронов Валентин, Мэзло Заурбэч, Хъалил Аслъэн, «Хэкум и хъумакIуэхэр» къэрал фондым и щIыналъэ ­къудамэм и унафэщI Дадэ МуIэед, КъБР-м СпортымкIэ и министерствэм Зи узыншагъэм сэкъат иIэхэр спортым хэшэным хуэлажьэ и еджапIэм и унафэщI Кулюшин Александр сымэ. И лэжьыгъэкIэ и Iуэху хуэмыкIуэу зэIущIэм кърихьэлIэфакъым Базиев Магомед.

Спортсменхэм Ставрополь щекIуэкIа «Хэкум и хъумакIуэхэм я кубок» щIыналъэ зэхуаку зэхьэзэхуэм ехъулIэныгъэфIхэр къыщагъэлъэгъуащ. Абы хэтащ Кавказ Ищхъэрэ, Ипщэ федеральнэ щIыналъэхэм, Донецк, Луганск цIыхубэ республикэхэм щыщу дзэ Iуэху хэхам и ветерани 130-м щIигъу.
Хъалил Аслъэн пневматическэ фочкIэ нэщанэ еуэн зэпеуэм текIуэныгъэр къыщихьащ, Мэзло Заурбэч бжьыпэр щиубыдащ шабзэшэкIэ нэщанэ щеуэ зэхьэзэхуэм. Базиев Магомед дыжьын медалыр къыщыхуагъэфэщащ шабзэшэкIэ нэщанэ еуэн, армрестлинг зэпеуэхэм. ШабзэшэкIэ нэщанэ еуахэм я деж ещанэ увыпIэр щиубыдащ Воронов Валентин. Спортсменхэм адэкIэ я зэфIэкI щагъэлъэгъуэнущ «Хэкум и хъумакIуэхэм я кубок» урысейпсо зэпеуэм и финалым.
НэхъапэкIэ дзэ Iуэху хэхам хэту уIэгъэ хъури, щIалэхэм я узыншагъэр зэфIагъэувэжащ, иджыпсту абыхэм зыщагъасэ КъБР-м СпортымкIэ и министерствэм Зи узыншагъэм сэкъат иIэхэр спортым хэшэным хуэлажьэ и еджапIэм.
ЗэIущIэм щытепсэлъыхьащ дзэ Iуэху хэхам хэтхэм, абыхэм я унагъуэхэм унэтIыныгъэ зэхуэмыдэхэмкIэ ират дэIэпыкъуныгъэхэм. КIуэкIуэ Казбек къыхигъэщащ щIалэхэр, абыхэм я унагъуэхэр дэIыгъыным хуэунэтIауэ ирагъэкIуэкI лэжьыгъэм жыджэру къызэрыпащэнур, ведомствэхэм я къару псори абы зэрырахьэлIэнур.
ЩIыналъэм и УнафэщIым я гъащIэм щымысхьу Хэкур зыхъумэ лIыхъужьхэм, зауэлI псоми фIыщIэ яхуищIащ я зэфIэкIым, хэкупсэу зэрыщытым, лIыгъэ къагъэлъагъуэм, ТекIуэныгъэм зэрыхущIэкъум, жылагъуэ гъащIэм жыджэру зэрыхэтым, къытщIэхъуэ щIэблэр гъэсэным хэлъхьэныгъэ зэрыхуащIым папщIэ. «Фэ иджыри зэ къэвгъэлъэгъуащ фи гуащIэр зыхуэдэр, фи зэфIэкIыр здынэсыр. Сигуми си псэми къабгъэдэкIыу фи ехъу­лIэныгъэхэмкIэ сынывохъуэхъу», - жиIащ КIуэкIуэ Казбек.