Турист кIуапIэхэр

Урысей Федерацэм Экономикэ зыужьыныгъэмкIэ и министерствэм иджыблагъэ къызэритамкIэ, «Росстат»-м къита хъыбархэм ятещIыхьауэ, Къэбэрдей-Балъкъэрым бжьыпэр къэралым щиIыгъщ щIыналъэхэм ику иту зы жэщ нэху къыщекIа туристхэм я бжыгъэмкIэ. 2024 гъэм республикэм ику иту жэщ-махуи 6,9-кIэ хьэщIэхэр ди деж къыщызэтеувыIащ.

Псалъэм папщIэ, Севастополь къалэм ику иту жэщ-махуи 6,2-кIэ къыщыувыIащ, Кърымым - махуихкIэ, къэралыр псор къапщтэмэ – махуиплIкIэ. 2024 гъэм и щIышылэ - бадзэуэгъуэ мазэхэм псори зэхэту ди деж жэщу щагъэкIуам и бжыгъэм проценти 10-кIэ хэхъуащ 2023 гъэм елъытауэ икIи мелуани 195-рэ хъуащ.

Къэралым и щIыналъэхэр зэзыгъэлъагъуну къэзыкIухь туристхэм я бжыгъэр дызэрыт илъэсым и ипэ мазиблым мелуан 48,7-м нызэрыхьэсащ, ар процент 11,7-кIэ нэхъыбэщ нэгъабэ нэхърэ. Абы нэхъыбэу къыщыхэхъуар бадзэуэгъуэрщ – туристу мелуани 9,99-рэ зыплъыхьакIуэ ежьащ.

Хабзэ зэрыхъуауэ, къэралым и цIыхухэр нэхъыбэу здэкIуэ щIыпIэхэр Мэзкуу, Санкт-Петербург къалэхэрщ, Краснодар крайрщ, Мэзкуу областырщ, Тэтэрстанырщ. Ауэ Кавказ Ищхъэрэм и щIыналъэхэр - Къэбэрдей-Балъкъэрыр, Ингушыр, Шэшэныр, Дагъыстаныр, адэкIэ Якутиер, Амур областыр, Хабаровск крайр зэзыгъэлъагъуну хуейхэм я бжыгъэм псынщIэу зэрыхэхъуэмрэ и куэдагъымкIэ япэ итхэщ.

ИпэIуэкIэ хъыбар зэрыщыIащи, 2024 гъэм и япэ мазихым Къэбэрдей-Балъкъэрым туристу мин 800-м нэблагъэ къэкIуащ. 2023 гъэм къапщытэж лъэхъэнэм хуэзэу щыIа бжыгъэм нэхърэ процент 28-кIэ ар нэхъыбэщ.