Нартыху гъавапхъэмрэ Iусыпхъэмрэ

Къэбэрдей-Балъкъэрым нартыхур Iухыжыным щоужьэрэкI. ИпэIуэкIэ хъыбар зэрыщыIащи, мы гъэм а къэкIыгъэм хухахащ гектари I28-м щIигъу. Ар нэгъабэрейм нэхърэ нэхъыбэщ. Республикэм къыщрахьэлIэж а гъавэм крупа, хьэжыгъэ, спирт, крахмал, Iэщым ирагъэшхын Iусыпхъэ зэхэлъхэр, нэгъуэщIхэри къыхащIыкI. Абыхэм елэжь IуэщIапIэхэри щIыналъэм щыIэщ.

Дызэрыт илъэсым и япэ мазихым нартыхум къыхэщIыкIа крахмал гъущэу тонн мин 13 республикэм къыщыщIагъэкIащ, нэгъабэрей бжыгъэхэм нэхърэ ар процент 12-кIэ нэхъыбэщ. Химие пкъыгъуэхэр зыхалъхьа, зи зэхэлъыкIэм зрагъэхъуэжа крахмалу тонн мин 24-рэ къыщIагъэкIащ е 2023 гъэм и япэ мазихым щыIа бжыгъэхэм проценти 140-кIэ хуэкIуэу.

Дызэрыт илъэсым и япэ мазихым къриубыдэу нартыхур нэхъыбэу зыхэлъ Iусыпхъэу къыщIагъэкIам и куэдагъыр тонн мин 58,4-рэ хъуащ е нэгъабэрей бжыгъэхэм нэхърэ процент 54-кIэ нэхъыбэ.

А псом къадэкIуэу, ди республикэм нартыхум зэрыщелэжьым имызакъуэу, абы и жылапхъэхэр нэгъуэщI щIыналъэхэми хурагъашэ. Абы нэмыщI, мыри къыхэбгъэщыну гуапэщ - Кавказ Ищхъэрэм и щIыналъэхэм я деж Къэбэрдей-Балъкъэрым нартыху гъэкIынымкIэ бжьыпэр щиIыгъщ. 2023 гъэм нартыхуу псори зэхэту тонн мелуан 1,05-рэ республикэм къыщрахьэлIэжащ.