Iухыжыгъуэр щIагъэхуабжьэ

Урысей Федерацэм и Правительстэвм и УнафэщIым и къуэдзэ Патрушев Дмитрий иджыблагъэ иригъэкIуэкIащ къэралым и ­мэкъумэш-промышленнэ комплексыр и къалэнхэм зэрехъулIэ щIыкIэмрэ губгъуэ лэжьыгъэхэр зэрекIуэкIымрэ теухуа зэIущIэ. 

«Къэралым и щIыналъэхэм я мэкъумэ­шыщIэхэр пэрыхьащ гъавэщIэр къехьэ­лIэжыным ехьэлIа лэжьыгъэхэм. Иджыпсту ­гъавэу кърахьэлIэжащ тонн мелуан 93-рэ, абы щыщу тонн мелуан 70,5-р гуэдзу. Хьэкъщ, мы гъэм псори зэхэту зэщIакъуэжыну гъавэм и куэдагъыр дунейм и щытыкIам елъытауэ зэры­щытынур. Ауэ, дауэ хъуми, УФ-м Мэкъумэш ­хозяйствэмкIэ и министерствэм зыхуигъэувы-жа къалэным - гъавэу тонн мелуани 132-рэ ­къе­хьэ­лIэжыным - хущIэкъунущ», - жиIащ Патрушев Дмитрий.
Гъавэ Iухыжыгъуэм къэралым и дэнэ щIыпIи щоужьэрэкI. 2025 гъэм екIуэкIыну губгъуэ лэжьыгъэхэм ятеухуауэ Патрушев Дмитрий къызэхуэсахэм ягу къигъэкIыжащ къэралым къыщагъэкIа жылапхъэхэм хуэкIуэжын зэры­хуейр. ИкIи абы и лъэны­къуэкIэ ехъулIэныгъэ хъарзынэхэри щыIэщ. Псалъэм папщIэ, бжьы­хьэсэ гъавэу мы гъэм кърахьэлIэжам и процент 90-м щIигъур къэралым и жылапхъэхэм къатащ. 
ВидеоIэмал зэпыщIэныгъэхэр къигъэсэбэпу Патрушев Дмитрий иригъэкIуэкIа зэIущIэм ­хэтащ Къэбэрдей-Балъкъэрым мэкъумэш хозяйствэмкIэ и министр Сыжажэ Хьэсэн.
Иджыпсту республикэм къыщрахьэлIэж нартыху жылапхъэр, сэхураныр, соер, хадэхэкIхэр, кIэртIофыр, пхъэщхьэмыщхьэхэмрэ мэракIуэ лIэужьыгъуэхэмрэ. Дызэрыт илъэсым и мази­блым къриубыдэу щIыналъэм и мэкъумэш IэнатIэхэм продукцэу къыщIагъэкIащ сом мелард 24,4-рэ я уасэ е проценти 104,1-кIэ нэгъабэрей бжыгъэхэм хуэкIуэу. Апхуэдэуи дызэрыт илъэсым и щIышылэ - бадзэуэгъуэ мазэхэм ерыскъыхэкIрэ псыхэкIыу къыщIагъэкIам и куэдагъым хэхъуащ. 
Гъавэу кърахьэлIэм и куэдагъым хагъэхъуэн мурадкIэ, республикэм лэжьыгъэшхуэ щрагъэкIуэкI. Абыхэм ящыщщ псы зыщIагъэлъадэ щIыр нэхъыбэ зэращIыр. «Дунейпсо кооперацэмрэ экспортымрэ» лъэпкъ пэхуэщIэм хыхьэу лажьэ «АПК-м и продукцэр хамэ къэралхэм ­яхуегъэшэн», «Мэкъумэшым хухаха щIым и нэхъыбэм псы щIагъэлъадэу Iуэхур зэтеублэн» федеральнэ пэхуэщIэхэм япкъ иткIэ дызэрыт илъэсым зэрыщIидзэрэ гектар мини 2,4-рэ абы къыхагъэхъуащ.