Гулъытэншэ ящIыркъым

«ЕджакIуэ кIуэм дэIэпыкъу» жыхуиIэ урысейпсо Iуэхум ипкъ иткIэ, УФ-м и МВД-м Налшык къалэм щиIэ Управленэм и лэжьакIуэхэмрэ Управленэм и Жылагъуэ советым хэтхэмрэ зыщIагъэкъуащ дунейм ехыжа я лэжьэгъум и унагъуэм.

Дунейм ехыжа, полицэм и лейтенант нэхъыжь Жанатаев Мурат и унагъуэм хуеблэгъащ полицэм и лейтенант нэхъыщIэ Раяновэ Наинэ, УФ-м и МВД-м Налшык къалэм щиIэ Управленэм и 5-нэ взводым и командир, полицэм и лейтенант Мэремкъул Артур, Управленэм и Жылагъуэ советым хэт Газаев Масхут сымэ.

Жанатаевым и фызабэ Дианэ сабиищ къыхуэнауэ епI.

Хабзэхъумэхэм ныбжьыщIэхэр ягъэгуфIащ, еджапIэм зыщыхуеину хьэпшыпхэмрэ IэфIыкIэрэ хуахьри. ХьэщIэхэр щIэупщIащ унагъуэм исхэм я узыншагъэкIэ, къинэмыщI IуэхугъуэхэмкIэ гукъеуэ щыIэмэ икIи жаIащ сыт и лъэныкъуэкIи зыщIагъэкъуэну зэрыхьэзырыр. Ахэр сабийхэм ехъуэхъуащ еджэгъуэ илъэсыр къайхъулIэну.

- ЕхъулIэныгъэфIхэмкIэ фи анэр вгъэгуфIэ, зэи зыщывмыгъэгъупщэ – дэ дыщыIэщ, сыт къэмыхъуами зыфщIэдгъэкъуэнущ, - жаIащ хабзэхъумэхэм.

- Псом нэхърэ нэхъыщхьэрати, гулъытэ къытхуэфщIащ. Щхьэгъусэм къыдэлажьэу щытахэмрэ и ныбжьэгъухэмрэ сыт щыгъуи къыддоIэпыкъу, Мурат абыхэм я гум зэримыхур хуабжьу си гуапэщ, - къажриIащ абыхэм Дианэ.

УФ-м и МВД-м Бахъсэн къалэм щиIэ къудамэм и лэжьакIуэхэр Ислъэмей къуажэм дэт 4-нэ курыт еджапIэм яхуеблэгъащ иджыблагъэ. Япэ классым кIуащ УФ-м и МВД-м Бахъсэн къалэм щиIэ къудамэм и лэжьакIуэ, полицэм и капитан Жынэ Мурат ипхъу нэхъыщIэр.

И адэм къыдэлажьэу щытахэр хъыджэбз цIыкIум ехъуэхъуащ курыт еджапIэм зэрыщIэтIысхьамкIэ, саугъэтхэри тыгъэ хуащIащ.

- Махуэшхуэхэр щагъэлъапIэм и закъуэ мыхъуу, сыт щыгъуи гулъытэншэ дызэрывмыщIым щхьэкIэ фIыщIэ фхудощI. Дэри сабийхэми гуапэ тщохъу Мурат зэрыфщымыгъупщэр, щымыIэжми, пщIэ зэрыхуэфщIыр, - жаIащ Жынэм и анэмрэ и фызабэмрэ.