МыIэрысэм къыхэщIыкIа шхыныгъуэщIэхэр

«Кавказ.РФ» зыужьыныгъэмкIэ институтым къызэритамкIэ, пхъэщхьэмыщхьэм щелэжь «Каббалкрастениеводство» IуэхущIапIэм мыIэрысэу тонн мини 7 зыщIэхуэ хъумапIэ иджыблагъэ къыщызэIуахащ. Сберымрэ Кавказ.РФ-мрэ зэгъусэу ягъэлажьэ, IэнатIэм мылъку къыхегъэлъхьэнымкIэ щыIэ программэм ипкъ иткIэ, ахъшэ щIыхуэу сом мелуан 250-рэ IуэхущIапIэм иратащ.

Нэгъабэ а программэм и фIыгъэкIэ, «Каббалкрастениеводство»-м и инвестицэ пэхуэщIэр гъэзэщIэным, мыIэрысэм зэрелэжь иджырей технологиер къэгъэсэбэпыным ехьэлIа Iуэхугъуэхэм мылъку къыхригъэлъхьащ.

Инвестицэ пэхуэщIэм и япэ Iыхьэр – зы жэщ-махуэм тонн 240-рэ зыщIэхуэ заводыр 2023 гъэм IуэхущIапIэм езым и ахъшэкIэ иухуэжащ. «Лэжьыгъэм мылъку къыхегъэлъхьэным хуэгъэпсауэ щыIэ программэм, Сберымрэ дэрэ дызэгъусэу дгъэлажьэм, Кавказ Ищхъэрэм и щIыналъэхэм я хьэрычэт IэнатIэ мыинымрэ курытымрэ я лIыкIуэхэр къыхыхьэ хъунущ.

«Ахъшэр къащтэ инвестицэ пэхуэщIэхэр ирагъэжьэфын е ирагъэжьа лэжьыгъэхэр къызэтемыувыIэн папщIэ. Мыхьэнэ иIэщ мыIэрысей хадэхэр куэду къыщагъэкI Къэбэрдей-Балъкъэрым апхуэдэ дэIэпыкъуныгъэхэр зэригъуэтым. Сыту жыпIэмэ, абы и фIыгъэкIэ республикэм и хозяйствэхэр пхъэщхьэмыщхьэхэм нэхъ жыджэру елэжьыну, къыщIигъэкI продукцэм и куэдагъми лIэужьыгъуэми хигъэхъуэну Iэмал нэхъыбэ иIэ мэхъу», - жиIащ Кавказ.РФ-м и унафэщIым и япэ къуэдзэ Цемахович Андрей.

 «Каббалкрастениеводство»-м и унэтIыныгъэ нэхъыщхьэр пхъэщхьэмыщхьэ жыгхэр гъэкIынырщ, къапыкIэхэр зэхэдзынырщ, хъумэнырщ, абыхэм елэжьынырщ. НобэкIэ IуэхущIапIэм пхъэщхьэмыщхьэ хъумапIэу 8 иIэщ, псори зэхэту тонн мин 17,4-рэ щIэхуэу.

А псом къадэкIуэу, «Каббалкрастениеводство»-р жыджэру пэрыхьащ сабийхэм ирагъэшх, IэфIыкIэм халъхьэ мыIэрысэ пIытIахэр къыщIэгъэкIыным. АбыкIи и мурадщ хамэ къэралхэм къраш апхуэдэ продукцэхэр езым ейхэмкIэ зэрихъуэкIыну.