КъБР-м и Iэтащхьэ КIуэкIуэ Казбек фIэхъус псалъэкIэ захуигъэзащ фокIадэм и 13-м республикэм къыщызэIуаха, Кавказ Ищхъэрэм АрхитектурэмкIэ и VIII фестивалым хэтхэм. Урысейм щыщ архитектор пажэхэр къызэкIуэлIа зэхуэсышхуэр егъэщIылIащ 2024 гъэр Архитектурэм и илъэсу зэрыщытым.
Налшык къеблэгъа хьэщIэ лъапIэхэм защыхуигъазэм, КIуэкIуэ Казбек щхьэхуэу фIыщIэ хуищIащ Урысейм и Архитекторхэм я зэгухьэныгъэм и унафэщI Шумаков Николай. Дэтхэнэ зыми Къэбэрдей-Балъкъэрым щрихьэкIыну зэманыр фIыкIэ игу къинэжыну, и IэщIагъэми къыщыхуэщхьэпэну ехъуэхъуащ.
Президент Путин Владимир къыхилъхьа проектхэмрэ программэхэмрэ ягъэзащIэу, иджыпсту къэралми ди республикэми лэжьыгъэшхуэ щызэфIах. Архитектурэм и мыхьэнэр абы нэхъри нэхъ лъагэ ещI.
АрхитектурэмкIэ фестивалыр фокIадэм и 16 пщIондэ зэхэтынущ. ЗэIущIэхэр, Къэбэрдей-Балъкъэрым хиубыдэ щIыпIэхэмрэ Налшыкрэ зэрызаужьыпхъэ лъэныкъуэхэм щытепсэлъыхьыну зэхуэсхэр мымащIэу къызэрагъэпэщынущ фестивалыр екIуэкIыху. КIуэкIуэ Казбек щыгъуазэ зищIащ зэпеуэхэм кърахьэлIа, 100-м щIигъу гъэлъэгъуэныгъэ проектхэм.
Ди щIыналъэм ухуэныгъэ лэжьыгъэхэр щIэгъэхуэбжьауэ щокIуэкI. 2018 гъэм щегъэжьауэ, абы процент 31-кIэ нэхъ зиубгъуащ, псэупIэ метр зэбгъузэнатIэ мелуани 3,4-м нэсым цIыхухэр щIагъэтIысхьэжакIэщ.
Лэжьыгъэхэр зэуIуу зэрырагъэкIуэкIыным йолIалIэ, гъуэгури, инфраструктурэри, рекреацэхэри зыхуей хуэзауэ зэфIэувэн хуэдэу. Апхуэдэхэм я щапхъэщ Налшык щыщ «Мэй», «КъуэкIыпIэ» хьэблэхэр. Ахэр хеубыдэ КИФЩI-м зегъэужьынымкIэ программэм, абы щекIуэкI псоми къэрал къэпщытакIуэхэр къыкIэлъоплъ.
Архитектурэр сэбэп мэхъу дыкъэзыухъуреихь дунейм и теплъэр зэрыхъунур уи нэгум къыщIэбгъэхьэнымкIэ. ЗыгъэпсэхупIэ-турист республикэу щыт Къэбэрдей-Балъкъэрым дежкIэ абы мыхьэнэшхуэ иIэщ.
КIуэкIуэ Казбек архитектор щIалэхэм ядэуэршэращ, щхьэж и еплъыкIэмкIэ къыдэгуэшащ республикэм и Iэтащхьэм. Къуажэхэмрэ къалэхэмрэ я теплъэм щелэжькIэ, ахэр нэхъыбэу Iуэхум къыхэшэн хуейщ, Iэтащхьэр зэреплъымкIэ.
«Ухуэныгъэ проектышхуэхэри абыхэм епха лэжьыгъэхэри, ахэр ину е нэхъ цIыкIуу щрет, Iэмал имыIэу архитекторхэри ухуакIуэхэри зэчэнджэщыжурэ ягъэхьэзырын хуейщ, цIыхубэм и еплъыкIэри IэщIыб ямыщIу. Дэ, шэч хэмылъу, Iуэхур апхуэдэу къызэгъэпэща хъуным делIэлIэнущ», - щетх КIуэкIуэ Казбек и телеграм-каналым.
