Телевиденэм и махуэм

Урысей гвардием и управленэу КъБР-м щыIэм и пресс-IуэхущIапIэм и унафэщIым и къалэнхэр пIалъэкIэ зыгъэзащIэ, полицэм и майор Лыкъуэжь Маринэ «КъБР 1», «Къэбэрдей-Балъкъэр» республикэ телеканалхэм я журналистхэм ехъуэхъуащ Телевиденэм и дунейпсо махуэмкIэ.

Ведомствэм и щIыналъэ къудамэм и унафIэщIым къыбгъэдэкIыу офицерым СМИ-м и лIыкIуэхэм фIыщIэ яхуищIащ илъэс куэд хъуауэ Iуэху зэрызэдащIэм, хабзэм и хъумакIуэхэм я лэжьыгъэр къызэрагъэлъагъуэм папщIэ икIи щIыхь тхылъхэр яритащ.
 - Фи фIыгъэкIэ телевизореплъхэм Iэмал яIэщ ди IэнатIэм и лэжьыгъэм ехьэлIа хъыбархэм, мыхьэнэ зиIэ нэгъуэщI Iуэхухэм щыгъуазэ защIыну. Си гуапэщ ехъулIэныгъэ фиIэну, зыхуэвгъэувыжа мурадхэм фалъэIэсыну, къывэплъхэм нэхъри къахэхъуэну, - жиIащ Лы­къуэжь Маринэ.