Процент 17,6-кIэ хэхъуащ

2024 гъэм и щIышылэ - фокIадэ мазэхэм къриубыдэу Къэбэрдей-Балъкъэрым и промышленнэ индексым процент 17,6-кIэ хэхъуащ нэгъабэ и апхуэдэ пIалъэм щыIа бжыгъэхэм елъытауэ.

Псалъэм къыдэкIуэу, псори зэхэту къыщIагъэкIамрэ къалэжьамрэ я куэдагъым процент 30,6-кIэ хэхъуащ, щIыуэпс хъугъуэфIыгъуэхэр къыщIэхынымкIэ проценти 5,6-кIэ, псыкIэ къызэзыгъэпэщхэм, псы къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зыгъэкъабзэхэм, зэщIэзыкъуэхэм проценти 5,3-кIэ. Апхуэдэу щыхъукIи, электрокъарукIэ, газкIэ, хуабэкIэ къызэзыгъэпэщ, хьэуар зыгъэкъабзэ IэнатIэхэм яхузэфIэкIыу щытам проценти 9,3-кIэ кIэрагъэхуащ. 
Дызэрыт илъэсым и мазибгъум къриубыдэу ухуэныгъэ материалхэм ящыщу асфальтрэ бетон зэхэщIауэ къыщIагъэкIахэм процент 45,5-кIэ, цемент гъэжам къыхэщIыкIа плитахэм, бетоным, IэрыщI мывэхэм процент 28,9-кIэ, чырбышым – проценти 8,2-кIэ хагъэхъуащ.
Къапщытэж лъэхъэнэм къриубыдэу химие пкъыгъуэхэр зыхэлъ продукцэхэм процент 0,2-кIэ, щэкIхэкIым елэжьхэм – проценти 9,6-кIэ, полиграфием - процент 12-кIэ, компьютерхэм, электроннэ, оптикэ Iэмэпсымэхэм – процент 12.4-кIэ кIэрыхуащ.
Мыдрейуэ, 2024 гъэм и щIышылэ - фокIадэм къриубыдэу Къэбэрдей-Балъкъэрым розницэ сатумкIэ сом мелард 219,3-рэ къилэжьащ е нэгъабэ и апхуэдэ пIалъэм щыIа бжыгъэхэм проценти 107,7-кIэ хуэкIуэу (иджыпсту къекIуэкI уасэхэм ятещIыхьауэ). 
Псалъэм папщIэ, ерыскъыхэкIыу ящэм и куэдагъым проценти 5,2-кIэ хагъэхъуащ икIи проценти 107,6-рэ хъуащ. Хьэпшыпхэм проценти 10-кIэ хагъэхъуащ, проценти 111,7-м ар нэсащ. 
Къапщытэж лъэхъэнэм къриубыдэу шхапIэхэм фейдэуэ сом меларди 10,8-рэ яIащ е процент 32,9-кIэ хэхъуащ. Республикэм и цIыхухэм пщIэ зыщIат Iуэхутхьэбзэу хуащIащ сом мелард 46,8-рэ и уасэ е ар проценти 7-кIэ нэхъыбэ хъуащ.